​បាល់ទាត់៖ តារាង​កីឡាករ​ស៊ុត​បញ្ចូល​ទី​ច្រើនជាងគេ​ (Top-Scorers) នៃ​ក្របខណ្ឌ​លី​គ​កំពូល​កម្ពុជាកាន់តែ​តានតឹង​ ក្នុង​ដំណើរ​ឆ្ពោះទៅ​ប្រជែង​ស្បែកជើង​មាសដោយមាន​កីឡាករ ៦​រូបមកពី ៣​ក្លិប​រកបាន​គ្រាប់​បាល់​យ៉ាង​ប្រកៀក​ប្រកិត​គ្នា ស្របពេល​សមាជិក​ក្រុម​ព្រះខ័ន​រាជ​ស្វាយរៀង Jean Marie Privat Brfolo Mbarga នៅតែ​បន្ដ​ឈរ​កំពូល​តារាង​បណ្ដោះអាសន្ន។​

Privat ទោះបី​អវត្តមាន​ក្នុងការ​ប្រកួត ដែល​ព្រះខ័ន​រាជ​ស្វាយរៀងបាន​យកឈ្នះ​ក្រុម​កងយោធ​ពល​ខេមរភូមិន្ទ ៣-២ កាលពី​ចុង​សប្ដាហ៍​កន្លងទៅ ប៉ុន្ដែ​ខ្សែប្រយុទ្ធ​កា​មេ​រ៉ូ​ន​រូបនេះនៅតែ​រក្សា​កៅអី​កំពូល​តារាង Top-Scorers បណ្ដោះអាសន្នបន្ទាប់ពី​រកបាន ១១​គ្រាប់ ហើយ​តាម​ពីក្រោយ​​ដោយ​កីឡាករ ៥​រូប​ទៀតដែល​រកបាន ១០​គ្រាប់​ស្មើគ្នាគិត​ត្រឹម​សប្ដាហ៍​ទី​១២។​ ​ចំពោះ​បេក្ខភាព Top-Scorers ៥​រូបដែល​រកបាន ១០​គ្រាប់​ស្មើគ្នា រួមមាន​សមាជិក​ក្រុម​ព្រះខ័ន​រាជ​ស្វាយរៀង Miguel Angel Junco Martinez ហៅ Mika, កីឡាករ​បឹងកេត ចាន់ វឌ្ឍនាកា និង Abee Hurber និង​កីឡាករ​វិសាខា Ajayi Opeyemi Korede និង Marcus Haber។

ក្នុងចំណោម​កីឡាករ​ទាំងអស់នេះ ភាគច្រើន​សុទ្ធតែ​មានឱកាស​រក​គ្រាប់​បាល់​បន្ថែម​មុន​បញ្ចប់​ជុំ​ទី​១ លើកលែងតែ​កីឡាករ Abee Hurber ដែល​រង់ចាំ​រហូតដល់​ជុំ​ទី​២ ដ្បិត​រូបគេ​ទើប​ផ្ទេរ​មកពី​ក្រុម​អាស៊ី​អឺរ៉ុបមិនទាន់​អាច​បង្ហាញខ្លួន​ឲ្យ​ក្រុម​ថ្មី​បានឡើយ។​ ​ក្រៅពី​កីឡាករ​ស៊ុត​បញ្ចូល​ទី​ច្រើនជាងគេ ៦​រូប​ខាងលើ ក៏មាន​កីឡាករ​ជាច្រើន​ទៀតរកបាន​គ្រាប់​បាល់​ជា​បន្ដបន្ទាប់ និង​ប្រដេញ​តាម​ពីក្រោយ​ផងដែររួមមាន​កីឡាករ កែវ សុខ​ផេង របស់​វិសាខា និង​ខ្សែប្រយុទ្ធ​ណាហ្គា​វើ​ល​ដ៏ Marcio ដែល​រកបាន ៩​គ្រាប់​ស្មើគ្នា និង​កីឡាករ​ភ្នំពេញ​ក្រោ​ន Adres Nieto រកបាន ៨​គ្រាប់​ជាដើម៕

​អត្ថបទ លី ឈុន​ឡា