អាកាសធាតុនៅកូរ៉េខាងត្បូង បានឡើងកម្តៅរហូតដល់ ៤០អង្សាសេ លើកដំបូងក្នុងពេល ៦ឆ្នាំកាលពីថ្ងៃអាទិត្យ (០៤ សីហា) ស្របពេលរលកកម្តៅមិនឈប់ឈរ បានវាយលុកប្រទេសនេះចាប់តាំងពីចុងខែកក្កដាមកបន្ទាប់ពីរដូវខ្យល់មូសុង។

លក្ខខណ្ឌអាកាសធាតុបច្ចុប្បន្ននៅលើឧបទ្វីបកូរ៉េគឺស្រដៀងនឹងរដូវក្តៅបំបែកកំណត់ត្រាក្នុងឆ្នាំ២០១៨ ដែលបង្កឱ្យមានការព្រួយបារម្ភថាឆ្នាំនេះអាចនឹងក្លាយទៅជាឆ្នាំក្តៅបំផុតមួយក្នុងកំណត់ត្រា។ រលកកម្ដៅដ៏ធ្ងន់ធ្ងរបានបណ្តាលឱ្យមានប្រហែល ៥៤០ករណីនៃជំងឺដែលទាក់ទងនឹងកម្ដៅចាប់ពីថ្ងៃទី២៩ ខែកក្កដា ដល់ថ្ងៃទី០៣ ខែសីហា ហើយត្រូវបានផ្សារភ្ជាប់ទៅនឹងអ្នកស្លាប់ចំនួន ៥នាក់ក្នុងរយៈពេលត្រឹមតែ ២ថ្ងៃប៉ុណ្ណោះចាប់ពីថ្ងៃទី០២ ខែសីហាដល់ថ្ងៃទី០៤ ខែសីហា នៅកូរ៉េខាងត្បូង។

កូរ៉េខាងត្បូងឥឡូវនេះបានកត់ត្រាសីតុណ្ហភាពលើសពី ៤០អង្សាសេ ក្នុងឱកាសចំនួន ៨លើក រួមទាំងថ្មីៗនេះផងដែរ។ សីតុណ្ហភាពក្ដៅខ្លាំងដំបូងគេត្រូវបានគេកត់ត្រានៅថ្ងៃទី០១ ខែសីហា ឆ្នាំ១៩៤២ ដោយមិនមានការកើតឡើងស្រដៀងគ្នានេះទេរហូតដល់មានការលេចឡើងគួរឱ្យកត់សម្គាល់នៅខែសីហា ឆ្នាំ២០១៩។

រលកកម្ដៅបច្ចុប្បន្នដែលជំរុញដោយការបញ្ចូលគ្នានៃប្រព័ន្ធសម្ពាធខ្ពស់ទីបេ និងប៉ាស៊ីហ្វិកខាងជើង ឆ្លុះបញ្ចាំងពីស្ថានភាពធ្ងន់ធ្ងរនៃរដូវក្តៅឆ្នាំ២០១៨។ កម្ដៅដ៏ក្ដៅគគុកនេះត្រូវបានគេរំពឹងថានឹងបន្តរហូតដល់យ៉ាងហោចណាស់ថ្ងៃទី១៤ ខែសីហា ជាមួយនឹងសីតុណ្ហភាពខ្ពស់ និងសំណើម នឹងនៅតែបន្តប៉ះពាល់ដល់ប្រទេសនេះ៕