ប្រទេសហ្វីលីពីន និងវៀតណាម ត្រៀមចាប់ផ្តើមសមយុទ្ធឆ្មាំល្បាតឆ្នេរគ្នាជាលើកដំបូងមិនធ្លាប់មាន នៅឈូងសមុទ្រទីក្រុងម៉ានីលក្នុងសប្តាហ៍នេះ ស្របតាមការប្តេជ្ញាចិត្តរបស់ប្រទេសទាំងពីរក្នុងការជំរុញកិច្ចសហប្រតិបត្តិការដែនសមុទ្រ។

សមយុទ្ធនៅថ្ងៃទី៩ ខែសីហា ខាងមុខនេះគឺជាសមយុទ្ធលើកដំបូងរវាងប្រជាជាតិអាស៊ីអាគ្នេយ៍ទាំងពីរ ដែលមានភាពតានតឹងក្នុងការទាមទារសិទ្ធលើផ្នែកខ្លះនៃសមុទ្រចិនខាងត្បូងជាមួយចិន។ ក្នុងដំណើរទស្សនកិច្ចផ្លូវរដ្ឋទៅកាន់ទីក្រុងហាណូយ របស់ប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr) កាលពីខែមករា ទីក្រុងម៉ានីល និងវៀតណាម បានចុះហត្ថលេខាលើកិច្ចព្រមព្រៀងចំនួនពីរ ដើម្បីជំរុញកិច្ចសហប្រតិបត្តិការរវាងឆ្មាំល្បាតឆ្នេររបស់ពួកគេ និងទប់ស្កាត់ឧប្បត្តិហេតុនៅសមុទ្រចិនខាងត្បូង។ 

នាវា ស៊ីអេសប៊ី ៨០០២ (CSB 8002) របស់វៀតណាម ប្រវែង ៩០ម៉ែត្របានទៅដល់កំពង់ផែទីក្រុងម៉ានីល នៅថ្ងៃចន្ទ (០៥ សីហា) នេះសម្រាប់ប្រតិបត្តិការនៅកំពង់ផែរយៈពេលប្រាំថ្ងៃ។

មន្ត្រីឆ្មាំល្បាតឆ្នេរហ្វីលីពីន (PCG) បាននិយាយថា នាវានោះនឹងធ្វើលំហាត់ហ្វឹកហ្វឺនជាមួយនាវាល្បាតឆ្នេរ ៨៣ម៉ែត្ររបស់ហ្វីលីពីន ឈ្មោះថា ប៊ីអាភី ហ្កាប្រីអ៊ែលឡា ស៊ីឡាង (BRP Gabriela Silang) កាលពីថ្ងៃសុក្រសប្ដាហ៍មុន ដែលនឹងផ្តោតលើការស្វែងរក និងជួយសង្គ្រោះ និងប្រតិបត្តិការផ្សេងទៀតនៅក្នុងសមយុទ្ធនេះ៕