ទិន្នន័យផ្លូវការបានបង្ហាញថា ចំនួនគូស្វាមីភរិយានៅប្រទេសចិន ដែលបានរៀបការនៅឆមាសទីមួយនៃឆ្នាំនេះ បានធ្លាក់ចុះដល់កម្រិតទាបបំផុតចាប់តាំងពីឆ្នាំ២០១៣ មក ខណៈមនុស្សវ័យក្មេងកាន់តែច្រើនបានពន្យាពេលរៀបអាពាហ៍ពិពាហ៍ ស្របពេលមានសេដ្ឋកិច្ចធ្លាក់ចុះ និងការកើនឡើងនៃថ្លៃចំណាយប្រចាំថ្ងៃ។

ចំនួនអាពាហ៍ពិពាហ៍នៅក្នុងប្រទេសចិន មានទំនាក់ទំនងយ៉ាងជិតស្និទ្ធទៅនឹងអត្រាកំណើត ហើយការធ្លាក់ចុះនេះទំនងជាធ្វើឱ្យរដ្ឋាភិបាលខកចិត្ត ខណៈខ្លួនព្យាយាមយ៉ាងខ្លាំងក្នុងការជំរុញកំណើនប្រជាជនដែលបានធ្លាក់ចុះអស់ជាច្រើនឆ្នាំ។ 

ទិន្នន័យស្តីពីការចុះបញ្ជីអាពាហ៍ពិពាហ៍បានបង្ហាញថា គូស្វាមីភរិយាសរុបចំនួន ៣,៤៣លានគូបានរៀបការក្នុងរយៈពេល ៦ ខែដំបូងនៃឆ្នាំនេះ ពោលគឺធ្លាក់ចុះចំនួន ៤៩៨.០០០គូធៀបនឹងរយៈពេលដូចគ្នាកាលពីឆ្នាំមុន។

អាពាហ៍ពិពាហ៍ត្រូវបានគេមើលឃើញថាជាលក្ខខណ្ឌចាំបាច់សម្រាប់ការមានកូន ដោយសារតែការលើកទឹកចិត្តនិងគោលនយោបាយដែលមានលក្ខណៈទូលំទូលាយ រួមទាំងការតម្រូវឱ្យឪពុកម្តាយបង្ហាញសំបុត្រអាពាហ៍ពិពាហ៍ដើម្បីចុះបញ្ជីជាតិកូន និងទទួលបានអត្ថប្រយោជន៍ពីរដ្ឋ។

យុវជនចិនជាច្រើនកំពុងជ្រើសរើសនៅលីវ ឬពន្យាពេលរៀបការ ដោយសារការរំពឹងទុកការងារមិនល្អ និងការព្រួយបារម្ភអំពីអនាគត ដោយសារកំណើនសេដ្ឋកិច្ចធំទីពីររបស់ពិភពលោកកំពុងយឺតយ៉ាវ៕