បំណាក់ដី និងទឹកជំនន់ បានសម្លាប់មនុស្សជាង ១៥០ នាក់នៅទូទាំងភាគខាងត្បូងប្រទេសចិនក្នុងរយៈពេល ២ ខែចុងក្រោយនេះ ខណៈព្យុះភ្លៀងបានវាយប្រហារតំបន់នេះ។  

ប្រព័ន្ធផ្សព្វផ្សាយរដ្ឋបាននិយាយថា ក្នុងគ្រោះមហន្តរាយចុងក្រោយនេះ ទឹកជំនន់ និងបំណាក់ដី កាលពីព្រឹកថ្ងៃសៅរ៍ សប្ដាហ៍មុន នៅតំបន់ភ្នំទីបេ ក្នុងខេត្តស៊ីឈួន បានបណ្តាលឲ្យមនុស្ស ៨ នាក់ស្លាប់ និង ១៩ នាក់ទៀតនៅមិនទាន់រកឃើញនៅឡើយ។   

ទីភ្នាក់ងារព័ត៌មានស៊ីនហួរ បាននិយាយថា គ្រោះមហន្តរាយនៅព្រឹកព្រលឹមបានបំផ្លាញផ្ទះសម្បែង និងបានសម្លាប់មនុស្សយ៉ាងហោចណាស់ ៦ នាក់នៅក្នុងភូមិ រីទី (Ridi) ។ មនុស្សពីរនាក់ទៀតបានស្លាប់ និង ៨ នាក់កំពុងបាត់ខ្លួននៅទីនោះ បន្ទាប់ពីស្ពានមួយនៅចន្លោះផ្លូវរូងក្រោមដីពីរបានបាក់រលំ និងរថយន្តចំនួន ៤ គ្រឿងបានធ្លាក់។ 

ប្រទេសចិនកំពុងស្ថិតក្នុងពាក់កណ្តាលរដូវទឹកជំនន់ខ្ពស់បំផុតរបស់ខ្លួន ដែលចាប់ផ្តើមពីពាក់កណ្តាលខែកក្កដាដល់ពាក់កណ្តាលខែសីហា ហើយអ្នកបង្កើតគោលនយោបាយចិនបានព្រមានម្តងហើយម្តងទៀតថា រដ្ឋាភិបាលចាំបាច់ត្រូវបង្កើនការត្រៀមរៀបចំគ្រោះមហន្តរាយ ដោយសារអាកាសធាតុកាន់តែធ្ងន់ធ្ងរ។

របាយការណ៍ប្រចាំឆ្នាំរបស់រដ្ឋាភិបាលស្តីពីអាកាសធាតុ បាននិយាយកាលពីខែមុនថាទិន្នន័យប្រវត្តិសាស្ត្របង្ហាញពីភាពញឹកញាប់នៃភ្លៀងធ្លាក់ខ្លាំង និងរលកកម្ដៅកើនឡើងនៅក្នុងប្រទេសចិន នេះបើយោងតាមទូរទស្សន៍រដ្ឋ CCTV ។

មានព្យុះភ្លៀងធ្ងន់ធ្ងរមួយចំនួន បានឆក់យកជីវិតមនុស្សជាច្រើននាក់ចាប់តាំងពីខែមិថុនា៕