អនុប្រធានាធិបតីអាមេរិក លោកស្រី Kamala Harris នឹងជ្រើសរើសមិត្តរួមតំណែងរបស់លោកស្រីឲ្យបានឆាប់ ត្រឹមថ្ងៃទី៥ ខែសីហា ខណៈដែលលោកស្រីត្រៀមសម្រាប់ការធ្វើដំណើរទៅកាន់រដ្ឋសមរភូមិ នៅសហរដ្ឋអាមេរិក ដោយមានបំណងបង្វែរភាពរំជើបរំជួល ចំពោះការប៉ុនប៉ងប្រជែងតំណែងប្រធានាធិបតីរបស់លោកស្រីឲ្យទៅជាការគាំទ្រដ៏ឋិតឋេរដែលអាចផ្តល់ថាមពលឲ្យលោកស្រីទទួលបានជ័យជម្នះ។

ផ្លូវទាំងអស់ទៅកាន់សេតវិមានត្រូវឆ្លងកាត់រដ្ឋសមរភូមិមួយចំនួនតូច ហើយលោកស្រី Harris នឹងចាប់ផ្តើមការធ្វើដំណើររយៈពេល ៥ថ្ងៃរបស់លោកស្រី ចាប់ពីថ្ងៃទី៦ ខែសីហា នៅក្នុងរដ្ឋដ៏ធំបំផុត គឺរដ្ឋ Pennsylvania ខណៈដែលលោកស្រីកំពុងបង្កើតសន្ទុះ សម្រាប់ការប្រកួតប្រជែងជាមួយលោក Donald Trump បេក្ខេជនមកពីគណបក្សសាធារណរដ្ឋ នៅថ្ងៃទី៥ ខែវិច្ឆិកា។

យ៉ាងណាក្ដី កិច្ចការបន្ទាប់នៅលើរបៀបវារៈ គឺការជ្រើសរើសបេក្ខជនអនុប្រធានាធិបតី ដោយមុនពេលការជួបជុំរបស់លោកស្រី នៅល្ងាចថ្ងៃទី៦ ខែសីហា ការប្រកាសដែលត្រូវបានពឹងទុក នឹងកើតឡើងនៅពេលណាមួយ រួមជាមួយអ្នកដែលត្រូវបានតែងតាំងដ៏អាថ៌កំបាំង នៅទីក្រុង Philadelphia ជាទីក្រុងធំបំផុតរបស់រដ្ឋ Pennsylvania។

រដ្ឋ Pennsylvania ត្រូវបានគ្រប់គ្រងដោយសមាជិករបស់គណបក្សប្រជាធិបតេយ្យ គឺលោក Josh Shapiro វ័យ ៥១ឆ្នាំ ជាអ្នកនាំមុខគេនៅក្នុងបញ្ជីជ្រើសរើស ដែលរួមមានអ្នកកាន់តំណែងអភិបាលរដ្ឋដូចគ្នាដែរ គឺលោក Tim Walz និងលោក Andy Beshear ក៏ដូចជាសមាជិកព្រឹទ្ធសភារដ្ឋ Arizona លោក Mark Kelly និងរដ្ឋមន្ត្រីក្រសួងដឹកជញ្ជូនអាមេរិក លោក Pete Buttigieg៕