ទីភ្នាក់ងារព័ត៌មាន Interfax របស់រុស្ស៊ី បានរាយការណ៍ថា លេខាធិការក្រុមប្រឹក្សាសន្តិសុខរុស្ស៊ី លោក Sergei Shoigu បានធ្វើដំណើរទៅដល់ទីក្រុងតេអេរ៉ង់ហើយ នៅថ្ងៃចន្ទ (ទី៥ ខែសីហា) នេះ ដើម្បីពិភាក្សាជាមួយថ្នាក់ដឹកនាំអ៊ីរ៉ង់ ក្នុងនោះរួមទាំងជាមួយប្រធានាធិបតី លោក Masoud Pezeshkian ផងដែរ។

ដំណើរទស្សនកិច្ចនេះ កំពុងកើតឡើង នៅពេលដែលភាពតានតឹង នៅតំបន់មជ្ឈិមបូព៌ា មានកាន់តែខ្លាំងឡើងៗ ខណៈការភ័យខ្លាចពីការរាលដាលសង្គ្រាម ក្នុងតំបន់ ក៏មានកាន់តែធំឡើងៗផងដែរ បន្ទាប់ពីលោក Ismail Haniyeh មេដឹកនាំក្រុមសកម្មប្រយុទ្ធហាម៉ាសប៉ាឡេស្ទីន ត្រូវបានគេធ្វើឃាតនៅក្រុងតេអេរ៉ង់ កាលពីសប្តាហ៍មុន។

អ៊ីរ៉ង់បានដាក់ការទទួលខុសត្រូវលើអ៊ីស្រាអែល ចំពោះការធ្វើឃាតនេះ ហើយបាននិយាយថា ខ្លួននឹង «ដាក់ទោស» ដល់អ៊ីស្រាអែល ដែលមន្ត្រីរបស់ប្រទេសនេះ មិនបានអះអាងទទួលខុសត្រូវនោះឡើយ ចំពោះហេតុការណ៍វាយប្រហារបណ្ដាលឲ្យមេដឹកនាំក្រុមហាម៉ាសស្លាប់នោះ។

សារព័ត៌មាន Interfax បានឲ្យដឹងថា លោក Shoigu ដែលកាន់តំណែងជារដ្ឋមន្ត្រីការពារជាតិរបស់រុស្ស៊ី មុនពេលផ្លាស់ទៅក្រុមប្រឹក្សាសន្តិសុខ ក្នុងខែឧសភា ក៏នឹងជួបជាមួយប្រធានសន្តិសុខជាតិ និងជាប្រធានបុគ្គលិកទូទៅរបស់អ៊ីរ៉ង់ផងដែរ។

គួរបញ្ជាក់ថា រុស្ស៊ីបានពង្រឹងទំនាក់ទំនងកាន់តែជិតស្និទ្ធជាមួយអ៊ីរ៉ង់ ចាប់តាំងពីការចាប់ផ្តើមសង្រ្គាមជាមួយអ៊ុយក្រែន ហើយបាននិយាយថា ខ្លួនកំពុងរៀបចំចុះហត្ថលេខាលើកិច្ចព្រមព្រៀងសហប្រតិបត្តិការយ៉ាងទូលំទូលាយជាមួយរដ្ឋអ៊ិស្លាមមួយនេះ។

សារព័ត៌មាន Reuters បានរាយការណ៍កាលពីខែកុម្ភៈថា អ៊ីរ៉ង់បានផ្តល់ឲ្យរុស្ស៊ីនូវមីស៊ីលបាលីស្ទិកបាញ់លើដីដ៏មានអានុភាពមួយចំនួនធំ។ សហរដ្ឋអាមេរិកបាននិយាយកាលពីខែមិថុនាថា រុស្ស៊ីហាក់ដូចជាកំពុងពង្រឹងកិច្ចសហប្រតិបត្តិការការពារជាតិរបស់ខ្លួនជាមួយអ៊ីរ៉ង់ ហើយទំនងជាបានទទួលយានដ្រូនវាយប្រហារប្រើតែម្ដងរាប់រយគ្រឿងដែលប្រទេសនេះកំពុងប្រើវាយប្រហារអ៊ុយក្រែន ជាការលើកឡើងដែលទីក្រុងម៉ូស្គូបដិសេធ៕