អង្គការសហប្រជាជាតិ បានអំពាវនាវឱ្យមាន «ភាពរអត់ធ្មត់» និងបានទទូចថា ការបង្កើតរដ្ឋាភិបាលបណ្តោះអាសន្ននៅក្នុងប្រទេសអាស៊ីខាងត្បូងមួយនេះ មានលក្ខណៈប្រជាធិបតេយ្យ បន្ទាប់ពីនាយករដ្ឋមន្ត្រី លោកស្រី Sheik Hasina បានលាលែងពីតំណែង ហើយភៀសខ្លួនចេញពីប្រទេស។

ការចាកចេញរបស់លោកស្រី Hasina កើតឡើងបន្ទាប់ពីមនុស្សរាប់រយនាក់ត្រូវបានសម្លាប់នៅក្នុងការបង្រ្កាបលើបាតុកម្ម ដែលបានចាប់ផ្តើមជាការតវ៉ាប្រឆាំងទៅនឹងប្រព័ន្ធកូតាការងារអនុគ្រោះ ហើយបានក្លាយទៅជាចលនាទាមទារឱ្យលោកស្រីលាចេញពីតំណែង។

ឧត្តមសេនីយ លោក Waker-Uz-Zaman មេបញ្ជាការកងទ័ពបង់ក្លាដែស បានប្រកាសការលាលែងពីតំណែងរបស់ លោកស្រី Hasina នៅក្នុងសុន្ទរកថាតាមទូរទស្សន៍ និងបាននិយាយថា រដ្ឋាភិបាលបណ្តោះអាសន្នមួយនឹងត្រូវបានបង្កើតឡើង។ នៅក្នុងសេចក្តីថ្លែងការណ៍ នៅលើគេហទំព័ររបស់អង្គការសហប្រជាជាតិ អ្នកនាំពាក្យអង្គការសហប្រជាជាតិលោក Farhan Haq បាននិយាយថា «លោកអគ្គលេខាធិការ មានការសោកស្តាយចំពោះការបាត់បង់អាយុជីវិតប្រជាជន ក្នុងអំឡុងពេលបាតុកម្ម នៅក្នុងប្រទេសបង់ក្លាដែស កាលពីចុងសប្តាហ៍ ដោយលោកបានទទូចឲ្យមានភាពស្ងប់ស្ងាត់គ្រប់ភាគីទាំងអស់ និងបានបញ្ជាក់ពីសារៈសំខាន់នៃសន្តិភាព សណ្តាប់ធ្នាប់ និងការផ្លាស់ប្តូរលទ្ធិប្រជាធិបតេយ្យ។

លោក Haq បាននិយាយទៅកាន់អ្នកសារព័ត៌មាននៅអង្គការសហប្រជាជាតិថា «យើងជំរុញឱ្យកងកម្លាំងសន្តិសុខការពារអ្នកទាំងឡាយ ដែលនៅតាមផ្លូវនៃទីក្រុង Dhaka និងទីក្រុងដទៃទៀត ក្នុងប្រទេសបង់ក្លាដែស។

បង់ក្លាដែស ត្រូវបានបំផ្លាញដោយបាតុកម្ម និងអំពើហិង្សា បន្ទាប់ពីការតវ៉ារបស់និស្សិត កាលពីខែមុនប្រឆាំងទៅនឹងប្រព័ន្ធកូតាការងារ ដែលបានបម្រុងទុកផ្នែកខ្ពស់ៗក្នុងការងាររបស់រដ្ឋាភិបាល ហើយក្រុមមួយចំនួន បានធ្វើឲ្យរីកធំក្នុងយុទ្ធនាការទាមទារបណ្តេញលោកស្រី Hasina ចេញពីតំណែង ជាអ្នកដែលបានឈ្នះអាណត្តិទីបួនជាប់គ្នា កាលពីខែមករា ក្នុងការបោះឆ្នោតមួយដែលធ្វើពហិការដោយគណបក្សប្រឆាំង។