មជ្ឈមណ្ឌលព្យុះសង្ឃរាជាតិអាមេរិក (NHC) បាននិយាយថា ខណៈព្យុះដេប៊ី(Debby) បានបោកបក់លើភាគខាងជើងរដ្ឋ Florida ខណៈព្យុះត្រូពិចនេះបានចុះខ្សោយជាបណ្តើរៗក្រោមឥទ្ធិពលព្យុះសង្ឃរា ដោយមានកម្លាំងខ្យល់អតិបរមា ១១០ គីឡូម៉ែត្រក្នុងមួយម៉ោង។

លោកប្រធានាធិបតី Joe Biden បានអនុម័តសេចក្តីប្រកាសគ្រាអាសន្នមួយសម្រាប់រដ្ឋ សៅ ខារ៉ូឡាយណា (South Carolina) ខណៈរដ្ឋនេះ ត្រៀមខ្លួនសម្រាប់ភ្លៀងធ្លាក់ជាប្រវត្តិសាស្ត្របណ្ដាលមកពីព្យុះត្រូពិចដេប៊ី ។

លោក Biden បានចេញបញ្ជាកាលពីរសៀលថ្ងៃចន្ទសប្ដាហ៍នេះ ដើម្បីឲ្យរដ្ឋាភិបាលអាចផ្តល់ជំនួយសម្រាប់វិធានការសង្គ្រោះបន្ទាន់ទាំងឡាយ ដើម្បីសង្គ្រោះជីវិតប្រជាពលរដ្ឋ។

ព្យុះ សង្ឃរាដេប៊ី បានវាយប្រហារជាព្យុះប្រភេទទី ១ នៅក្នុងតំបន់ Big Bend នៃរដ្ឋ Florida កាលពីព្រឹកថ្ងៃចន្ទ ៥ សីហា បង្កជាទឹកជំនន់ ហើយបានចាប់ផ្តើមបោកបក់ក្នុងល្បឿនយឺតៗ ឆ្ពោះទៅកាន់ឆ្នេរអាត្លង់ទិក បណ្ដាលឲ្យមានភ្លៀងធ្លាក់មួយសប្តាហ៍ និងទឹកជំនន់ដ៏មហន្តរាយនៅទូទាំងភាគអាគ្នេយ៍សហរដ្ឋអាមេរិក។

យោងតាមទិន្នន័យពី PowerOutage.us បានឱ្យដឹងថាលំនៅឋានប្រជាពលរដ្ឋ និងហាងអាជីវកម្មជាង ២៣៥.០០០ ខ្នង និងកន្លែងនៅរដ្ឋនេះ គ្មានអគ្គិសនីប្រើប្រាស់៕