ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃចន្ទថា ការវិភាគចុងក្រោយបង្អស់របស់អង្គការសហប្រជាជាតិស្តីពីការឃ្លាំមើលតាមផ្កាយរណបដែលគ្របដណ្តប់លើតំបន់ហ្កាហ្សាស្ទ្រីប បានបង្ហាញថា រចនាសម្ព័ន្ធចំនួន ៦៣ភាគរយនៅក្នុងតំបន់ហ្កាហ្សា ត្រូវរងការខូចខាត។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា មជ្ឈមណ្ឌលផ្កាយរណបរបស់អង្គការសហប្រជាជាតិ បានវិភាគទិន្នន័យដែលប្រមូលបាន កាលពីមួយខែមុន។

OCHA បាននិយាយថា ការទម្លាក់គ្រាប់បែក និងអរិភាពនៅតំបន់ហ្កាហ្សា បន្តសម្លាប់ បង្ករបួស និងជម្លៀសប្រជាជនប៉ាឡេស្ទីន ដោយបង្កការខូចខាត និងបំផ្លាញផ្ទះសម្បែងអស់ជាច្រើនខ្នង និងហេដ្ឋារចនាសម្ព័ន្ធ។

OCHA បានបញ្ជាក់ថា៖«ក្នុងរយៈពេលត្រឹមតែ ៤៨ម៉ោងចុងក្រោយនេះ សាលារៀនចំនួនបី ដែលផ្តល់ជម្រកដល់ជនភៀសខ្លួន នៅក្នុងទីក្រុងហ្កាហ្សា ត្រូវបានរាយការណ៍ថា បានរងការវាយប្រហារ ដែលបាន បណ្តាលឲ្យមនុស្សស្លាប់ និងរាប់សិបនាក់រងរបួស។ នេះបើយោងតាមអង្គការការការពារស៊ីវិលប៉ាឡេ ស្ទីន»។

«ក្រុមដៃគូនៅក្នុងតំបន់នេះ កំពុងវាយតម្លៃតម្រូវការរបស់មនុស្សដែលបានភៀសខ្លួន ហើយបាននិងកំពុងផ្តល់ជំនួយ»។

ការិយាល័យនេះ បាននិយាយថា យោធាអ៊ីស្រាអែល បានចេញបញ្ជាជម្លៀសថ្មីសម្រាប់ប្រជាជន ដែលរស់នៅក្នុងតំបន់ភាគខាងត្បូងទីក្រុងខាន់ យូនីស ( Khan Younis)និងភាគខាងជើងទីក្រុងរ៉ាហ្វា ( Rafah) ផ្លាស់ទីពីភាគខាងលិច ទៅកាន់ទីក្រុងអាល់ ម៉ាវ៉ាស៊ី ( Al Mawasi) ភ្លាមៗ។