ក្រសួងសុខាភិបាលប្រទេសស៊ូដង់ បានប្រកាសកាលពីថ្ងៃចន្ទថា មនុស្សយ៉ាងហោចណាស់ ៣២ នាក់បានស្លាប់ និង ១០៧ នាក់ផ្សេងទៀតរងរបួស ដោយសារតែភ្លៀងធ្លាក់ខ្លាំង និងទឹកជំនន់ ដែលបានវាយលុកនៅរដ្ឋជាច្រើនរបស់ប្រទេសស៊ូដង់។ លោក Al-Fadil Mohamed Mahmoud ប្រធានអង្គភាពសង្គ្រោះបន្ទាន់ បាននិយាយនៅក្នុងសេចក្តីថ្លែងការណ៍ថា រដ្ឋចំនួន៧ បានរងផលប៉ះពាល់ដោយទឹកភ្លៀង និងទឹកជំនន់ ហើយលំនៅឋានចំនួន ៥.៥៦៥ខ្នង បានរងការខូចខាត។

លោកនិយាយថា ភ្លៀងធ្លាក់ខ្លាំង និងទឹកជំនន់ បាននាំឲ្យមានករណីជំងឺរាគបង្កឡើងដោយទឹក ជាច្រើនករណី ក្នុងរដ្ឋចំនួន៣ ប៉ុន្តែស្ថានភាពសុខភាពក្នុងរដ្ឋផ្សេងទៀតមានស្ថិរភាព ដោយលោក បាននិយាយថា ក្រសួងសុខាភិបាល មានការព្រួយបារម្ភក្នុងការចាត់វិធានការចាំបាច់ដើម្បីប្រយុទ្ធប្រឆាំងជំងឺរាតត្បាតនៅរដូវវស្សា។

នៅក្នុងរបាយការណ៍មុន អាជ្ញាធរឧតុនិយមប្រទេសស៊ូដង់ បានរំពឹងថា នឹងមានការកើនឡើងនៃកម្រិតទឹកទន្លេ Gash ដែលហូរកាត់ទីក្រុង Kassala រដ្ឋធានីរបស់រដ្ឋ Kassala ។ ប្រជាជន ត្រូវបានជំរុញឲ្យប្រុងប្រយ័ត្ន និងនៅឲ្យឆ្ងាយពីមាត់ទន្លេ។ បញ្ហាទឹកជំនន់ តែងកើតឡើងរាល់ឆ្នាំក្នុងប្រទេសស៊ូដង់ ដែលជាធម្មតានៅចន្លោះខែមិថុនា ដល់ខែតុលា។

ក្នុងរយៈពេលបីឆ្នាំកន្លងទៅនេះ ភ្លៀងធ្លាក់ខ្លាំង បានឆក់យកជីវិតមនុស្សរាប់រយនាក់ និងបំផ្លាញដីកសិកម្មយ៉ាងច្រើន។

រដូវវស្សាឆ្នាំនេះ បានបន្ថែមការលំបាកប្រឈមមុខដោយអ្នកទាំងឡាយដែលប៉ះពាល់ដោយជម្លោះ កំពុងបន្ត រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) ។ ប្រទេសស៊ូដង់ បាននិងកំពុងជួបប្រទះជម្លោះដ៏បង្ហូរឈាម ចាប់តាំងពីថ្ងៃទី១៥ ខែមេសាឆ្នាំ២០២៣ បណ្តាលឱ្យមានការបាត់បង់ជីវិតមនុស្សយ៉ាងហោចណាស់១៦.៦៥០នាក់។

យោងតាមទិន្នន័យរបស់អង្គការសហប្រជាជាតិដែលបានចេញផ្សាយកាលពីថ្ងៃច័ន្ទ បានឱ្យដឹងថា មនុស្សប្រមាណ ១០,៧ លាននាក់ បានភៀសខ្លួននៅក្នុងប្រទេសស៊ូដង់ ដោយប្រហែល ២,២ លាននាក់ផ្សេងទៀតកំពុងស្វែងរកទីជ្រកកោន នៅក្នុងប្រទេសជិតខាង។