យោងតាមរបាយការណ៍ថ្មី ដែលបានចេញផ្សាយកាលពីថ្ងៃចន្ទ បានឱ្យដឹងថា មនុស្សម្នាក់ក្នុងចំណោមមនុស្ស៤នាក់នៅក្នុងប្រទេសអាល្លឺម៉ង់ បានជួបប្រទះបញ្ហាសុខភាពដោយសារតែកម្តៅក្តៅខ្លាំង នៅឆ្នាំនេះ។ ភាពអស់កម្លាំង បញ្ហាដំណើរឈាមរត់ និងបញ្ហាដំណេក ជាបញ្ហា ដែលត្រូវជួបប្រទះក្នុងចំណោមប្រជាជនអាល្លឺម៉ង់ក្នុងអំឡុងពេលរលកកម្តៅ នេះបើយោងតាមការស្ទង់មតិ ដែលធ្វើឡើងដោយក្រុមហ៊ុនធានារ៉ាប់រងសុខភាពមួយ។

មនុស្សចាស់គឺងាយរងគ្រោះជាងគេ ដោយប្រហែលមួយភាគបីនៃអ្នកដែលមានអាយុលើសពី៦០ឆ្នាំ បានរងផលប៉ះពាល់។ ជាទូទៅ រលកកម្តៅ និងអាកាសធាតុក្តៅខ្លាំង គឺជាក្តីបារម្ភធំមួយសម្រាប់ប្រជាជនជិតពីរភាគបីនៅក្នុងប្រទេសអាល្លឺម៉ង់។

មនុស្សវ័យក្មេង ដែលមានអាយុពី១៨ ទៅ២៩ឆ្នាំ មានការធុញថប់អារម្មណ៍ ដោយ២៣ភាគរយ និយាយថាពួកគេ «ព្រួយបារម្ភខ្លាំង» ចំពោះការវិវត្តន៍នេះ។

ការស្ទង់មតិ បានបង្ហាញពីតម្រូវការបន្ទាន់ សម្រាប់សកម្មភាពនៅក្នុងវិស័យផ្សេងៗ។ ប្រហែល៨៩ភាគរយនៃអ្នកឆ្លើយតប ជឿថាឧស្សាហកម្មនានាដែលត្រូវការកម្លាំងពលកម្មមនុស្សច្រើន បានរងផលប៉ះពាល់ ខ្លាំងដោយសាររលកកម្តៅ។ ទន្ទឹមនឹងនេះ ៨០ ភាគរយ ចាត់ទុកវិស័យថែទាំថាងាយរងគ្រោះ ហើយ៥៨ ភាគរយ មានការព្រួយបារម្ភអំពីការថែទាំវេជ្ជសាស្រ្តនៅក្នុងមន្ទីរពេទ្យ។

នាយកប្រតិបត្តិក្រុមហ៊ុនធានារ៉ាប់រង DAK លោក Andreas Storm និយាយថា «វាគួរឱ្យព្រួយបារម្ភថាតើមានមនុស្សប៉ុន្មាននាក់នឹងមានបញ្ហាសុខភាពនៅក្នុងសប្តាហ៍ដំបូងនៃការកើនឡើងកម្តៅ»។

របាយការណ៍ស្តីពីកម្តៅរបស់យើង បង្ហាញថាផលប៉ះពាល់នៃសីតុណ្ហភាពក្តៅខ្លាំង កំពុងធ្វើឱ្យមានភាពតានតឹងកាន់តែខ្លាំងឡើងលើសុខភាពរបស់មនុស្សចាស់ ហើយកំពុងបង្កឱ្យមានការព្រួយបារម្ភខ្លាំងសម្រាប់មនុស្សជំនាន់ក្រោយជាពិសេស។

របាយការណ៍ស្តីពីកម្តៅរបស់ក្រុមហ៊ុនធានារ៉ាប់រង គឺផ្អែកលើការស្ទង់មតិតាមអ៊ីនធឺណិតលើពលរដ្ឋអាល្លឺម៉ង់ ១.០០៦នាក់ មានអាយុចាប់ពី១៨ឆ្នាំឡើង ហើយត្រូវបានធ្វើឡើងដោយវិទ្យាស្ថាន Forsa ។