បាល់ទាត់៖ ក្រុមភ្នំពេញក្រោនបានស្នើផ្លាស់ប្ដូរកាលបរិច្ឆេទប្រកួតសប្ដាហ៍ទី១៣ នៃលីគកំពូលកម្ពុជាជាមួយក្លិបអង្គរថាយហ្គឺរ ១ថ្ងៃ បន្ទាប់ពីក្រុមខ្លួនត្រូវជួបក្រុមម្ចាស់ផ្ទះនគរបាលជាតិក្នុងជំនួបបង្គ្រប់សប្ដាហ៍ទី៧ នៅទីលាន 7NG នាថ្ងៃទី០៨ ខែកញ្ញា ឆ្នាំ២០២១ ស្អែកនេះ។
ជំនួបបញ្ចប់ជើងទី១ រវាងក្រុមសិង្ហក្រហមភ្នំពេញក្រោន និងក្រុមខ្លាទឹកក្រូចអង្គរថាយហ្គឺរ ដំបូងឡើយត្រូវប្រកួតនៅថ្ងៃទី១១ ខែកញ្ញា ប៉ុន្ដែក្លិបភ្នំពេញក្រោនបានស្នើប្ដូរទៅប្រកួតនាថ្ងៃទី១២ ខែកញ្ញាវិញ។ តបតាមកាករស្នើសុំ និងមានការព្រមព្រៀងរវាងក្លិបទាំងពីរ គណៈកម្មការប្រកួតបាល់ទាត់ជាតិកម្ពុជា-CNCC ក៏បានឯកភាព និងកែសម្រួលកាលបរិច្ឆេទប្រកួតរវាងក្រុមទាំងពីរ តាមការស្នើសុំដោយរក្សាទីកន្លែង និងម៉ោងប្រកួតនៅដដែល។
គួរបញ្ជាក់ថា បច្ចុប្បន្នភ្នំពេញក្រោន និងអង្គរថាយហ្គឺរកំពុងមានពិន្ទុប្រកៀកប្រកិតគ្នា ក្នុងតារាងចំណាត់ថ្នាក់ Top-6 ដោយអតីតក្រុមជើងឯកលីគ ៦សម័យភ្នំពេញក្រោនឈរលេខ៣ និងមាន ២២ពិន្ទុស្មើក្រុមព្រះខ័នរាជស្វាយរៀង បន្ទាប់ពីប្រកួត ១០លើកឈ្នះ ៦ និងស្មើ ៤ ខណៈអង្គរថាយហ្គឺរឈរលេខ៥ មាន ២១ពិន្ទុបន្ទាប់ពីប្រកួត ១១លើក ឈ្នះ ៦ ស្មើ៣ និងចាញ់ ២ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
