បណ្តាប្រទេសនៅតំបន់មជ្ឈិមបូព៌ា ត្រៀមលក្ខណៈទប់ទល់នឹងការរីករាលដាលនៃសង្គ្រាមអ៊ីស្រាអែល និងក្រុមហាម៉ាស ខណៈដែលអ៊ីរ៉ង់គំរាមសងសឹក ចំពោះការសម្លាប់មេដឹកនាំនយោបាយរបស់ក្រុមហាម៉ាស នៅទីក្រុងតេអេរ៉ង់ កាលពីសប្តាហ៍មុន។

មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានប្តេជ្ញាឆ្លើយតបជាមួយអ៊ីស្រាអែលវិញ ចំពោះការធ្វើឃាតលើលោក Ismail Haniyeh ប្រធានការិយាល័យនយោបាយរបស់ក្រុមហាម៉ាស។ ហើយកងឆ្មាំបដិវត្តន៍អ៊ិស្លាមអ៊ីរ៉ង់ បានព្រមានអំពី «ការសងសឹកដោយឈាម» យ៉ាងពិតប្រាកដ។ ទាំងក្រុងតេអេរ៉ង់ និងក្រុមហាម៉ាស បានដាក់ការទទួលខុសត្រូវទៅលើអ៊ីស្រាអែល ចំពោះការសម្លាប់នេះ ប៉ុន្តែអ៊ីស្រាអែលទាំងមិនបានបញ្ជាក់អះអាង ឬបដិសេធការជាប់ពាក់ព័ន្ធណាមួយឡើយ។

ពលរដ្ឋលីបង់ត្រៀមភៀសខ្លួន ចំពេលមានភាពតានតឹងកើនឡើង ខណៈដែលស្ថានទូតអាមេរិក នៅទីក្រុងបេរូត ជំរុញឲ្យពលរដ្ឋអាមេរិកចាកចេញ ស្របពេលក្រុមហ៊ុនអាកាសចរណ៍ផ្អាកជើងហោះហើររបស់ខ្លួន។ នៅអ៊ីស្រាអែល រដ្ឋាភិបាលវាយតម្លៃការត្រៀមខ្លួន និងជម្រើស សម្រាប់ការវាយប្រហារដែលអាចកើតមានពីអ៊ីរ៉ង់ និងសម្ព័ន្ធមិត្តរបស់ប្រទេសនេះ ខណៈដែលពលរដ្ឋស្តុកទុកគ្រឿងផ្គត់ផ្គង់ប្រើប្រាស់ចាំបាច់នានា។

ការវិវត្តស្ថានការណ៍ក្នុងសប្តាហ៍នេះ អាចផ្លាស់ប្តូរការផ្តោតអារម្មណ៍យ៉ាងខ្លាំងចេញពីតំបន់ហ្កាហ្សា ប្រសិនបើការសងសឹករបស់អ៊ីរ៉ង់ រីករាលទៅជាជម្លោះក្នុងតំបន់ដ៏ទូលំទូលាយ ដែលមានពាក់ព័ន្ធនឹងសហរដ្ឋអាមេរិក និងប្រទេសដទៃទៀត ដោយនេះធ្វើឲ្យប៉ះពាល់ដល់កិច្ចខិតខំប្រឹងប្រែងស្វែងរកបទឈប់បាញ់ និងការចរចាដោះលែងចំណាប់ថ្នូរ។ 

មន្ត្រីការពារជាតិអាមេរិក និងអ៊ីស្រាអែលពិភាក្សាគ្នា អំពីយុទ្ធសាស្ត្រការពារអ៊ីស្រាអែល ដោយបង្កើនការត្រៀមខ្លួនឲ្យបានរួចជាស្រេច ក្នុងតំបន់។ កិច្ចខិតខំប្រឹងប្រែងផ្នែកការទូត ដើម្បីកាត់បន្ថយភាពតានតឹង នៅតែបន្តមាន ដោយបណ្ដាប្រទេសក្នុងតំបន់ ព្យាយាមទាក់ទងជាមួយអ៊ីរ៉ង់។

មន្ត្រីអ៊ីរ៉ង់នៅតែបន្តការគំរាមកំហែងរបស់ពួកគេ ខណៈដែលក្រៅពីត្រៀមទប់ទល់ជាមួយអ៊ីរ៉ង់ហើយនោះ អ៊ីស្រាអែលក៏ត្រូវរៀបចំត្រៀមសម្រាប់ការវាយប្រហារ ដែលអាចកើតមានពីភាគខាងជើងរបស់ខ្លួនផងដែរ បន្ទាប់ពីមានការធ្វើឃាតលើមេបញ្ជាការរបស់ក្រុមហេសបូឡា គឺលោក Fu’ad Shukr។ 

តែទោះជាយ៉ាងក្ដី អំឡុងពេលមានភាពតានតឹងទាំងនេះ ដំណើរជីវិតប្រចាំថ្ងៃ ទាំងនៅក្នុងទីក្រុងបេរូត និងអ៊ីស្រាអែលនៅតែប្រព្រឹត្តទៅជាធម្មតា ទោះបីជាមានការប្រុងប្រយ័ត្នខ្ពស់ និងការត្រៀមខ្លួន សម្រាប់ជម្លោះដែលអាចកើតមានក៏ដោយ៕