ប្រទេសជប៉ុន នៅថ្ងៃអង្គារ (ទី៦ ខែសីហា) នេះ បានប្រារព្ធខួប ៧៩ឆ្នាំនៃការទម្លាក់គ្រាប់បែកបរមាណូរបស់សហរដ្ឋអាមេរិកទៅលើទីក្រុងហ៊ីរ៉ូស៊ីម៉ា (Hiroshima) ជាកន្លែងដែលនាយករដ្ឋមន្រ្តីជប៉ុន លោក Fumio Kishida បានអំពាវនាវឲ្យពិភពលោកគ្មានអាវុធនុយក្លេអ៊ែរ តែ «ការគំរាមកំហែងប្រើប្រាស់នុយក្លេអ៊ែរដោយរុស្ស៊ី» ធ្វើឲ្យមាន «បញ្ហាប្រឈមបន្ថែមទៀត»។

អ្នកចូលរួមប្រហែល ៥០.០០០នាក់ ក្នុងនោះរួមមានទាំងឯកអគ្គរដ្ឋទូតមកពីប្រទេសចំនួន ១០៩ប្រទេសផងដែរ បាននាំគ្នាអង្គុយនៅឯពិធីរំលឹកនោះនៅកន្លែងហាលវាល ដែលត្រូវបានប្រារព្ធឡើងនៅឧទ្យាន Hiroshima Peace Memorial។

លោកនាយករដ្ឋមន្ត្រី Kishida អភិបាលក្រុងហ៊ីរ៉ូស៊ីម៉ា លោក Kazumi Matsui និងអ្នកចូលរួមផ្សេងទៀតបានចូលរួមដាក់កម្រងផ្កាជាមួយគ្នា។

សំឡេងកណ្តឹងសន្តិភាព បានបន្លឺឡើងនៅម៉ោង ៨:១៥ព្រឹក ម៉ោងក្នុងស្រុក (ត្រូវនឹងម៉ោង ២៣:១៥នាទី ថ្ងៃចន្ទ) ជាសញ្ញាសម្គាល់ពីពេលវេលាដែលគ្រាប់បែកត្រូវបានទម្លាក់។ គ្រាប់បែកដែលមានឈ្មោះហៅក្រៅថា «Little Boy» បានទម្លាក់លើទីក្រុងហ៊ីរ៉ូស៊ីម៉ា នៅថ្ងៃទី៦ ខែសីហា ឆ្នាំ១៩៤៥ អំឡុងសង្គ្រាមលោកលើកទី២ ដោយបានសម្លាប់មនុស្សរាប់ពាន់នាក់ភ្លាមៗ និងប្រហែល ១៤០.០០០នាក់ទៀត នៅចុងឆ្នាំនោះ។ ប្រទេសជប៉ុនបានសុំចុះចាញ់សង្គ្រាមនោះ នៅថ្ងៃទី១៥ ខែសីហា ឆ្នាំ ១៩៤៥៕