មេបញ្ជាការកងទ័ពប្រទេសបង់ក្លាដែស មានផែនការជួបអ្នកដឹកនាំក្រុមបាតុករនិស្សិត នៅថ្ងៃអង្គារ ទី៦ សីហានេះ ខណៈប្រទេសបង់ក្លាដែស កំពុងរង់ចាំរដ្ឋាភិបាលថ្មី។ 

ផែនការនេះ កើតឡើងមួយថ្ងៃបន្ទាប់ពីនាយករដ្ឋមន្ត្រី លោកស្រី Sheikh Hasina បានលាលែងពីតំណែង ហើយបានភៀសខ្លួនចេញពីប្រទេស បន្ទាប់ពីការបះបោរដោយហិង្សាប្រឆាំងការគ្រប់គ្រងរបស់លោកស្រី។ 

មេដឹកនាំនិស្សិត ដែលបានដឹកនាំការតវ៉ាប្រឆាំងប្រព័ន្ធកូតាការងារ និងបានអំពាវនាវឱ្យមានការលាចេញពីតំណែងរបស់លោកស្រី Hasina កំពុងស្វែងរករដ្ឋាភិបាលបណ្តោះអាសន្នមួយ ជាមួយម្ចាស់ជ័យលាភីណូបែលសន្តិភាព លោក Muhammad Yunus ។

អ្នករៀបចំចលនានិស្សិតបីនាក់ បានចេញវីដេអូតាមបណ្តាញផ្សព្វផ្សាយសង្គមហ្វេសប៊ុក នៅព្រឹកថ្ងៃអង្គារនេះ បានបង្ហាញពីអ្វីដែលពួកគេចង់បាន។ 

លោក Nahid Islam គឺជាអ្នកដឹកនាំដ៏សំខាន់ម្នាក់នៃចលនានេះ និយាយថា «យើងនឹងមិនទទួលយករដ្ឋាភិបាលណាមួយផ្សេងឡើយ ក្រៅពីរដ្ឋាភិបាលដែលពួកយើងបានស្នើឡើង។ យើង នឹងមិនទទួលយករដ្ឋាភិបាល ដែលគាំទ្រដោយយោធា ឬអ្នកហ្វាស៊ីសនិយមនោះទេ ហើយរដ្ឋាភិបាលតំណាងណាមួយ ឬរដ្ឋាភិបាលប្រឆាំងប្រជាជន ក៏នឹងមិនត្រូវបានទទួលយកផងដែរ។

លោក បានអះអាងថា លោក Yunus បានព្រមព្រៀងធ្វើជាទីប្រឹក្សានៃរដ្ឋាភិបាលបណ្តោះអាសន្ន។ លោក Yunus ដែលមានអាយុ៨៤ឆ្នាំ និងធនាគារ Grameen របស់លោក បានឈ្នះរង្វាន់ណូបែលសន្តិភាពក្នុងឆ្នាំ២០០៦ សម្រាប់ការងារក្នុងការកាត់បន្ថយភាពក្រីក្រ ដោយផ្តល់ប្រាក់កម្ចីខ្នាតតូចក្រោម១០០ដុល្លារ ដល់ប្រជាជនក្រីក្រនៅជនបទក្នុងប្រទេសបង់ក្លាដែស។

លោកត្រូវបានតុលាការចោទប្រកាន់ កាលពីខែមិថុនា ពីបទកេងបន្លំ ដែលលោកបានបដិសេធ។ លោក Yunus ពុំបានឆ្លើយតបភ្លាមៗចំពោះសំណើសុំការអត្ថាធិប្បាយនេះទេ។