ក្រសួងការពារជាតិរបស់ប្រទេសប៉ូឡូញ បានចុះហត្ថលេខាលើកិច្ចព្រមព្រៀងទូទាត់សងជាមួយក្រុមហ៊ុន Boeing និងក្រុមហ៊ុន General Electric ដែលមានតម្លៃជិត មួយពាន់លាន ហ្ស្វ័រធី [zlotys] (២៥៥លានដុល្លារ) កាលពីថ្ងៃចន្ទ ដោយនាំឲ្យវាកាន់តែខិតជិតដល់ការបញ្ចប់កិច្ចព្រមព្រៀងទឹកប្រាក់ ១២ពាន់លានដុល្លារ ដើម្បីទិញឧទ្ធម្ភាគចក្រ AH-64E Apache ចំនួន ៩៦គ្រឿង។

កិច្ចព្រមព្រៀងទូទាត់សងនេះ ត្រូវបានធ្វើឡើង ដើម្បីសងដល់ប្រទេសដែលទិញអាវុធពីបរទេសតាមរយៈកិច្ចសហប្រតិបត្តិការរវាងអ្នកផ្គត់ផ្គង់ និងក្រុមហ៊ុនក្នុងស្រុក។

អនុរដ្ឋមន្ត្រីការពារជាតិប៉ូឡូញ លោក Pawel Bejda បាននិយាយថា៖«កងទ័ពប៉ូឡូញ ហៀបនឹងទិញបានឧទ្ធម្ភាគចក្រទាំងនេះ ដែលពិតជានឹងពង្រឹងការត្រៀមខ្លួនរបស់យើង សន្តិសុខរបស់យើងចំពោះមុខអ្វីដែលកំពុងកើតឡើងហួសពីព្រំដែននៃសាធារណរដ្ឋប៉ូឡូញ ខ្ញុំមានន័យថា គឺសង្រ្គាមនៅអ៊ុយក្រែន»។ 

កិច្ចព្រមព្រៀងទូទាត់សងជាមួយក្រុមហ៊ុន Boeing ដែលមានតម្លៃ ៤០០លាន ហ្ស្វ័រធី [zlotys] (១០២លានដុល្លារ) នឹងត្រូវចំណាយលើការគាំទ្រផ្នែកថែទាំសម្រាប់ឧទ្ធម្ភាគចក្រ និងការបណ្តុះបណ្តាលថែទាំ AH-64E។

កិច្ចព្រមព្រៀងជាមួយក្រុមហ៊ុន General Electric ដែលមានតម្លៃ ៥៣០លាន ហ្ស្វ័រធី [zlotys] (១៣៥ លានដុល្លារ) នឹងចំណាយទៅលើម៉ាស៊ីនសម្រាប់ឧទ្ធម្ភាចក្រ Apaches និងសម្រាប់ប្រព័ន្ធថាមពល នៅក្នុងឧទ្ធម្ភាគចក្រយោធាប៉ូឡូញផ្សេងទៀត។