ប្រធានអាជ្ញាធរប៉ាឡេស្ទីនលោក ម៉ាខ្មូត អាបាស ( Mahmoud Abbas) បាននិយាយថា អ៊ីស្រាអែល បានសម្លាប់មេដឹកនាំក្រុមហាម៉ាស លោក អ៊ីស្មេល ហានីយេ ( Ismail Haniyeh) ដើម្បីធ្វើឲ្យសង្គ្រាមរបស់ខ្លួននៅលើតំបន់ហ្កាហ្សាអូសបន្លាយពេលកាន់តែយូរ។ 

នៅក្នុងបទសម្ភាសន៍មួយដែលត្រូវបានចេញផ្សាយដោយទីភ្នាក់ងារសារព័ត៌មានរដ្ឋ RIA ជាភាសារុស្សីនៅ ថ្ងៃអង្គារនេះ លោក អាបាស បានថ្លែងថា ការធ្វើឃាតនេះ គឺជា «ទង្វើដ៏កំសាក និងជាការវិវឌ្ឍដ៏គ្រោះថ្នាក់ នៅក្នុងនយោបាយអ៊ីស្រាអែល»។

លោក បាននិយាយថា៖«គ្មានការសង្ស័យទេ គោលបំណងនៃការធ្វើឃាតលោក ហានីយេ គឺដើម្បីធ្វើឲ្យ សង្រ្គាមអូសបន្លាយពេលកាន់តែយូរ និងធ្វើវិសាលភាពរបស់វាកាន់តែធំឡើង»។ «វានឹងមានឥទ្ធិពលអវិជ្ជមានដល់ការចរចា ដែលកំពុងបន្ត ដើម្បីបញ្ចប់ការឈ្លានពាន និងដកទ័ពអ៊ីស្រាអែលចេញពីតំបន់ហ្កា ហ្សា»។

លោក អាបាស បាននិយាយថា លោកនឹងពិភាក្សាអំពីជម្លោះជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅទីក្រុងមូស្គូ។

ទីភ្នាក់ងារនេះ បានដកស្រង់ប្រភពការទូត ដោយនិយាយថា លោក អាបាស នឹងស្ថិតក្នុងរដ្ឋធានីរុស្ស៊ីពីថ្ងៃទី ១២ ដល់ថ្ងៃទី ១៤ ខែសីហា។