នាយកវិទ្យាស្ថានសិក្សាយុទ្ធសាស្ត្រ Eurasian ដែលជាអតីតទីប្រឹក្សារដ្ឋមន្ត្រី នៅស្ថានទូតកូរ៉េខាងត្បូងប្រចាំនៅប្រទេសរុស្ស៊ី លោក Park Byung-hwan បានប្រាប់សារព័ត៌មាន TASSថា ការផ្គត់ផ្គង់អាវុធរបស់កូរ៉េខាងត្បូង ដល់អ៊ុយក្រែន នឹងមិនផ្លាស់ប្តូរស្ថានភាពនៅក្នុងតំបន់នៃប្រតិបត្តិការយោធាពិសេសនោះទេ ប៉ុន្តែអាចធ្វើឲ្យទំនាក់ទំនងរវាងរុស្ស៊ី និងកូរ៉េខាងត្បូង កាន់តែអាក្រក់ឡើង។

លោកបានរំលឹកថា សាធារណរដ្ឋកូរ៉េបានប្រកាសបន្ទាប់ពីការបញ្ចប់សន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយរវាងរុស្ស៊ី និងកូរ៉េខាងជើង កាលពីថ្ងៃទី ១៩ ខែមិថុនាថា ខ្លួននឹងពិចារណាឡើងវិញនូវគោលនយោបាយរបស់ខ្លួន ក្នុងការបដិសេធការផ្គត់ផ្គង់អាវុធដល់អ៊ុយក្រែន។ ទីក្រុងសេអ៊ូល បាននិងកំពុងបញ្ជូនទៅកាន់ទីក្រុងគីវនូវជំនួយមនុស្សធម៌ និងហិរញ្ញវត្ថុ និងសម្ភារៈយោធាដែលមិនមានគ្រោះថ្នាក់ ដូចជាឧបករណ៍រាវរកមីន ប៉ុន្តែមិនមែនអាវុធទេ។

អ្នកជំនាញ បាននិយាយថា៖ «ការផ្គត់ផ្គង់សព្វាវុធដល់អ៊ុយក្រែនដោយសាធារណរដ្ឋកូរ៉េ នឹងមិនអាចមានផលប៉ះពាល់ខ្លាំងដល់ស្ថានភាពនៅលើសមរភូមិនោះទេ។ ការសម្រេចចិត្តនេះ មានដែនកំណត់ទាក់ទងនឹងការរារាំងកិច្ចសហប្រតិបត្តិការយោធារវាងរុស្ស៊ី និងកូរ៉េខាងជើង"។ មុននេះ ប្រព័ន្ធផ្សព្វផ្សាយដែលដកស្រង់សម្តីមន្ត្រីកូរ៉េខាងត្បូងដែលមិនបញ្ចេញឈ្មោះ បាននិយាយថា សាធារណរដ្ឋកូរ៉េ បានសម្រេចចិត្តប្រកាន់ខ្ជាប់នូវ«ភាពមិនប្រាកដប្រជាជាយុទ្ធសាស្ត្រ» លើការផ្គត់ផ្គង់ដល់អ៊ុយក្រែន ជាមធ្យោបាយនៃសម្ពាធ ដើម្បី «ទប់ស្កាត់ការផ្ទេរបច្ចេកវិទ្យាយោធា» ទៅកាន់ទីក្រុងព្យុងយ៉ាង។