បាល់ទាត់៖ ការប្រកួតជំរុះបាល់ទាត់ពិភពលោកតំបន់អាស៊ីជុំទី៣ នឹងបន្តប្រកួតទី២ នៅថ្ងៃនេះដែលមានពូល A និង B។ ក្រុមជប៉ុនបានហ្វឹកហាត់នៅទីក្រុងដូហាប្រទេសកាតានៅថ្ងៃចន្ទម្សិលមិញ ត្រៀមជួបចិនដែលប្រើប្រាស់កាតាជាទឹកដី។
ក្រុមសាមូរៃជប៉ុនបានចាប់ផ្តើមវគ្គជំរុះជុំទី៣ នេះជាមួយនឹងបរាជ័យគួរឱ្យភ្ញាក់ផ្អើលក្នុងទឹកដីខ្លួនឯង ក្រោមថ្វីជើងក្រុមភ្ញៀវអូម៉ង់ ១-០ កាលពីថ្ងៃព្រហស្បតិ៍សប្តាហ៍មុន។ តែនៅពេលនេះក្រុមរបស់លោក Hajime Moriyasu នឹងត្រូវជួបជាមួយចិនដែលចាញ់ប្រកួតដំបូងដូចគ្នាគឺចាញ់ក្រុមម្ចាស់ផ្ទះអូស្ត្រាលី ៣-០។ ជំនួបថ្ងៃនេះនៅទឹកដីកាតារវាងចិន និងជប៉ុនថ្ងៃនេះនឹងធ្វើឡើងនៅកីឡដ្ឋាន Khalifa International Stadium ជាទឹកដីដែលជប៉ុនធ្លាប់លើកពានជើងឯកទ្វីបអាស៊ីកាលពីឆ្នាំ២០១១ នៅពេលយកឈ្នះអូស្ត្រាលីនៅវគ្គផ្តាច់ព្រ័ត្រ ១-០ ក្នុងម៉ោងបន្ថែមកាត់សេចក្តី។
ក្រុមដែលគួរចាប់អារម្មណ៍មួយទៀតនៅក្នុងវគ្គជំរុះជុំទី៣ នេះគឺវៀតណាមដែលជាការបង្ហាញខ្លួនដំបូងនៅជុំទី៣ នេះ។ វៀតណាមបានដើរចូលមកដល់ជុំទី៣ នេះជាលើកដំបូងតែប្រកួតដំបូងក្នុងពូល B នេះវៀតណាមចាញ់នៅទឹកដីអារ៉ាប៊ីសាអ៊ូឌីត ៣-១ ទោះបីជានាំមុខមុនក៏ដោយ។ ក្រុមរបស់លោក Park Hang-seo កំពុងស្វែងរកជ័យជំនះដំបូងជាប្រវត្តិសាស្ត្រ សម្រាប់ក្រុមវៀតណាមនៅជុំទី៣ នេះដោយពួកគេនឹងទទួលអូស្ត្រាលីនៅទីក្រុងហាណូយ។ ចំណែកមួយគូទៀតថ្ងៃនេះដែរអូម៉ង់ និងអារ៉ាប៊ីសាអ៊ូឌីតនឹងជួបគ្នានៅទឹកដីទីក្រុង Muscat របស់អូម៉ង់ បន្ទាប់ពីក្រុមទាំងពីរសុទ្ធតែឈ្នះប្រកួតទី១ ដូចគ្នា។ ក្នុងពូល B នេះ អូស្ត្រាលី អារ៉ាប៊ីសាអ៊ូឌីត និងអូម៉ង់មាន ៣ពិន្ទុដូចគ្នា ខណៈ ៣ក្រុមទៀតមានជប៉ុន វៀតណាម និងចិនមានសូន្យពិន្ទុ។
ចំណែកពូល B វិញ ពូលនេះមានភាពតានតឹងក្រោយប្រកួតទី១ ដែលមានតែអ៊ីរ៉ង់តែមួយទេដែលទទួលបាន ៣ពិន្ទុក្រោយពីឈ្នះស៊ីរី ១-០។ ក្រៅពីនោះពីរគូទៀតសុទ្ធតែស្មើគ្នា ០-០ នៅប្រកួតទី១ ដែលរួមមានកូរ៉េខាងត្បូងស្មើអ៊ីរ៉ាក់ និងអារ៉ាប់រួមស្មើលីបង់។ នៅថ្ងៃនេះកូរ៉េខាងត្បូងនឹងត្រូវជួបជាមួយលីបង់, អ៊ីរ៉ាក់ជួបអ៊ីរ៉ង់ និងស៊ីរីជួបអារ៉ាប់រួម៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
