បេក្ខភាពប្រធានាធិបតីនៃគណបក្សប្រជាធិបតេយ្យ លោកស្រី កាម៉ាឡា ហារីស (Kamala Harris) និងបេក្ខភាពអនុប្រធានាធិបតីដែលត្រូវបានជ្រើសរើសថ្មីគឺអភិបាលរដ្ឋ មីននេសូថា (Minnesota) លោក ធីម វ៉លស៍ (Tim Walz) បានធ្វើយុទ្ធនាការជាលើកដំបូងជាមួយគ្នាកាលពីថ្ងៃអង្គារ (០៦ សីហា) នៅទីក្រុង ហ្វីឡាឌែលហ្វៀ (Philadelphia) ដោយចាប់ផ្តើមដំណើរជាច្រើនថ្ងៃទៅបណ្ដារដ្ឋប្រទាញប្រទង់ក្នុងគោលបំណងណែនាំលោក Walz ទៅកាន់វេទិកាជាតិ។

នៅក្នុងសុន្ទរកថារបស់ខ្លួនទៅកាន់ហ្វូងមនុស្សជាង ១០.០០០នាក់នៅសាកលវិទ្យាល័យ ថែមផល (Temple) លោក Walz បានរៀបរាប់ពីកុមារភាពរបស់លោកនៅក្នុងទីក្រុងតូចមួយនៃរដ្ឋ ណេប្រាស្កា (Nebraska), រយៈពេល ២៤ឆ្នាំរបស់លោកដែលបម្រើក្នុងឆ្មាំជាតិនៃកងទ័ព និងអាជីពពីមុនរបស់លោកជាគ្រូបង្រៀនផ្នែកសិក្សាសង្គមនៅវិទ្យាល័យ និងគ្រូបង្វឹកក្នុងកីឡាបាល់អោប។

លោកក៏បានងាកទៅរិះគន់បេក្ខភាពប្រធានាធិបតីមកពីគណបក្សសាធារណរដ្ឋ លោក Donald Trump និងដែគូរួមដំណែងរបស់លោកគឺព្រឹទ្ធសមាជិក ជែឌី វែនស៍ (JD Vance) ដែលជាការបង្ហាញដំបូងអំពីមធ្យោបាយដែលលោក Walz នឹងខិតចូលទៅជិតតួនាទី «វាយប្រហារ» តាមទម្លាប់របស់បេក្ខជនអនុប្រធានាធិបតីក្នុងពេលធ្វើយុទ្ធនាការ ទោះបីជាលោកជាមនុស្សមានបែបបទរួសរាយក៏ដោយ។

ការចូលទៅក្នុងការប្រជែងតំណែងសេតវិមានរបស់លោកស្រី Harris បន្ទាប់ពីលោកប្រធានាធិបតី Joe Biden បានបោះបង់បេក្ខភាព បានធ្វើឱ្យយុទ្ធនាការបោះឆ្នោតឡើងសន្ទុះយ៉ាងឆាប់រហ័ស ជាមួយនឹងការស្ទង់មតិបង្ហាញថា លោកស្រីបានលុបបំបាត់ការនាំមុខដែលលោក Trump ខិតខំបង្កើតមកជាយូរ៕