ម្ចាស់ជ័យលាភីរង្វាន់ណូបែលសន្តិភាព លោក មូហាម៉ាដ យូនុស (Muhammad Yunus) ត្រូវបានតែងតាំងជាប្រធានទីប្រឹក្សារដ្ឋាភិបាលបណ្តោះអាសន្នរបស់ប្រទេសបង់ក្លាដែស កាលពីថ្ងៃអង្គារ (០៦ សីហា) មួយថ្ងៃបន្ទាប់ពីនាយករដ្ឋមន្ត្រី លោកស្រី សេក ហាស៊ីណា (Sheikh Hasina) បានលាលែងពីតំណែង និងបានភៀសខ្លួនចេញពីប្រទេស បន្ទាប់ពីការបង្ក្រាបដោយហិង្សាលើការតវ៉ាដែលដឹកនាំដោយនិស្សិត។

ប្រព័ន្ធផ្សព្វផ្សាយក្នុងស្រុកបានរាយការណ៍កាលពីល្ងាចថ្ងៃអង្គារ ដោយដកស្រង់សេចក្តីថ្លែងការណ៍មួយ និងក្រុមមន្ត្រីមកពីការិយាល័យប្រធានាធិបតីបង់ក្លាដែសថា លោក Yunus ត្រូវបានតែងតាំងឱ្យកាន់តំណែងនេះដោយប្រធានាធិបតីបង់ក្លាដែស លោក មូហាម៉េដ សាហាប៊ូឌីន (Mohammed Shahabuddin) បន្ទាប់ពីលោកបានជួបជាមួយមេដឹកនាំនិស្សិត និងប្រធានសេវាយោធាទាំងបី។

លោក Yunus វ័យ ៨៤ឆ្នាំ និងធនាគារ ហ្ក្រាមីន (Grameen) របស់លោក ដែលជាអង្គការឥណទានខ្នាតតូច បានឈ្នះរង្វាន់ណូបែលសន្តិភាពឆ្នាំ២០០៦ សម្រាប់កិច្ចប្រឹងប្រែងទាញមនុស្សរាប់លាននាក់ចេញពីភាពក្រីក្រដោយផ្តល់ប្រាក់កម្ចីតូចៗក្រោម ១០០ដុល្លារដល់អ្នកក្រីក្រនៅតំបន់ជនបទរបស់បង់ក្លាដែស។

មិនមានការអត្ថាធិប្បាយភ្លាមៗពីលោក Yunus ក្នុងការឆ្លើយតបនឹងការតែងតាំងនោះទេ ហើយក៏មិនទាន់ដឹងភ្លាមដែរថា តើរដ្ឋាភិបាលបណ្ដោះអាសន្ននឹងទទួលបន្ទុកនៅពេលណា។ លោក Yunus កំពុងស្ថិតក្នុងទីក្រុងប៉ារីសដើម្បីធ្វើការព្យាបាល ហើយត្រូវបានគេរំពឹងថានឹងត្រឡប់ទៅទីក្រុងដាកា វិញក្នុងពេលឆាប់ៗនេះ។ នៅព្រឹកថ្ងៃអង្គារ លោកប្រធានាធិបតីបង់ក្លាដែស Shahabuddin បានរំលាយសភា ដោយជម្រះផ្លូវសម្រាប់រដ្ឋាភិបាលបណ្តោះអាសន្ន និងការបោះឆ្នោតថ្មី។ លោក Shahabuddin បាននិយាយថា រដ្ឋាភិបាលបណ្តោះអាសន្ននឹងរៀបចំការបោះឆ្នោតក្នុងពេលឆាប់ៗនេះ បន្ទាប់ពីចូលកាន់តំណែង៕