​កីឡា​ប្លែក៖ ​ស្រប​ពេលដែល Max Verstappen ឈ្នះ​ការប្រកួត F1 នៅក្នុង​ទឹកដី​របស់ខ្លួន​ប្រទេស​ហូ​ឡង់​ពេញ​ដោយ​សំឡេង​អឺងកង​ពី​អ្នកគាំទ្រ និង​សំឡេងរថយន្ត​ដ៏​លាន់លឺ​កាលពី​ថ្ងៃអាទិត្យ នៅ​ចក្រភព​អង់គ្លេស​ឯណេះ​វិញ​មានការ​ប្រកួត​កីឡា​ម្យ៉ាង ​ស្រដៀង​រថយន្ត​តែ​ទៅមុខ​ស្ងាត់ឈឹង​មិនលឺ​សំឡេង​។

​​ការប្រកួត​ដែល​គេ​ហៅថា British Pedal Car Championship នៅ​ទឹកដី​ចក្រភព​អង់គ្លេស​បាន​ឈានចូល​ជុំ​ទី៥ ដែល​កីឡាករ​ទាំងអស់​ត្រូវ​ជិះ​យានជំនិះ​ម្យ៉ាង ​ដែល​មើលទៅ​ចូល​រថយន្ត​ដោយសារ​មាន​កង់​បួន តែ​គ្មាន​ម៉ាស៊ីន​ឡើយ​គឺ​ទៅមុខ​ដោយ​កំលាំង​ធាក់​របស់​មនុស្ស​ដូច​កង់​។ ​​ការប្រកួត British Pedal Car Championship ឆ្នាំនេះ​ចាប់ផ្តើម​តាំងពី​ខែ​មិនានឹង​បន្ត​រហូតដល់​ដើមខែ​តុលា​ខាងមុខ​ ទើប​បញ្ចប់​រដូវ​កាល​របស់ខ្លួន​។​ ​​កីឡាករ​ទាំងអស់​ត្រូវ​ប្រកួត​នៅលើ​ទីលានប្រណាំង​រថយន្ត Go Kart ដែល​មួយ​ជុំ​មាន​ចំងាយ​ត្រឹម ៥២៥ម៉ែត្រ ហើយ​ត្រូវ​ប្រកួត​លើ​រយៈ​ចំងាយ ១៦០​គីឡូម៉ែត្រ រឺ​ស្មើនឹង​ជាង ៣០០ជុំ​។

​​ក្រុម​ដែល​ចូល​រួមមាន​ចំនួន ១៤ក្រុម ក្នុង​មួយក្រុម​មាន​កីឡាករ ៤នាក់រួមជាមួយ​សមាជិក​ផ្សេងទៀត​នៅ Pit Land​។ ​​អ្នកបើកបរ​តែងតែ​ផ្លាស់ប្តូរ​គ្នា​ជាង​រៀងរាល់​រយៈពេល ២០ ទៅ ៤០នាទី​។ ​ឆ្លងកាត់​ការប្រកួត​ប្រមាណ ៥ម៉ោង មាន​ពីរ​ក្រុម​ប៉ុណ្ណោះ​ដែល​ប្រជែង​គ្នា​ស្វិតស្វាញ​ដោយ​អ្នកឈ្នះ​ចុងក្រោយ​នោះ​គឺ​ក្រុម Wing Racing ខណៈ​លេខ២ បាន​ទៅ​ក្រុម Royce 2​។ ថ្ងៃទី២ ខែតុលា​នឹង​ជា​ជុំ​ចុងក្រោយ​រដូវ​កាល​នេះហើយ ​ដែល​នឹងធ្វើ​ការប្រកួត​នៅ​ទីលាន Curborough៕

​អត្ថបទ​៖​នាង សុភា​វុ​ធ