អតីតនាយករដ្ឋមន្ត្រីបង់ក្លាដែស លោកស្រី ខាឡេដា ហ្សេអា (Khaleda Zia) ត្រូវបានដោះលែងឲ្យមានសេរីភាពក្រោយការឃុំខ្លួនក្នុងផ្ទះជាច្រើនឆ្នាំ បន្ទាប់ពីសត្រូវដ៏ជូរចត់របស់ខ្លួន គឺលោកស្រី Sheikh Hasina ត្រូវបានបោះបង់ចោលតំណែងជានាយករដ្ឋមន្ត្រី ហើយបានភៀសខ្លួនខណៈក្រុមអ្នកតវ៉ាបានសម្រុកចូលវិមាននាយករដ្ឋមន្ត្រីរបស់លោកស្រី។

ការប្រកួតប្រជែងគ្នាយ៉ាងស្វិតស្វាញរវាងស្ត្រីពីរនាក់ បានរុញឲ្យស្ថានភាពនយោបាយក្នុងប្រទេសដែលមានអ្នកកាន់សាសនាអ៊ីស្លាមភាគច្រើន ធ្លាក់ចូលក្នុងភាពវឹកវរច្រើនទសវត្សរ៍មកនេះ។

លោកស្រី ខាឡេដា ហ្សេអា វ័យ៧៨ ឆ្នាំ ត្រូវបានកាត់ទោសឱ្យជាប់ពន្ធនាគាររយៈពេល១៧ឆ្នាំ ពីបទប្រព្រឹត្តអំពើពុករលួយក្នុងឆ្នាំ២០១៨ ក្រោមការគ្រប់គ្រងរបស់លោកស្រី Hasina ។លោកស្រី ធ្លាប់កាន់តំណែងជានាយករដ្ឋមន្រ្តីបង់ក្លាដែស បានចំនួន២អាណត្តិ អាណត្តិទី១ ចាប់ពីឆ្នាំ១៩៩១ ដល់ឆ្នាំ១៩៩៦ និងទី២ ពីឆ្នាំ២០០១ ដល់ឆ្នាំ២០០៦។

លោកស្រីHasina វ័យ៧៦ ឆ្នាំត្រូវបានរត់ភៀសខ្លួនកាលពីថ្ងៃចន្ទបន្ទាប់ពីការតវ៉ាដ៏ធំ ដោយមេទ័ពបានប្រកាសថាយោធានឹងបង្កើតរដ្ឋាភិបាលបណ្តោះអាសន្ន។

បន្ទាប់មក បទបញ្ជាត្រូវបានចេញឲ្យមានការដោះលែងអ្នកទោសពីការតវ៉ា ព្រមទាំងលោកស្រីហ្សេអាផងដែរ។

លោកស្រី ហ្សេអា គឺជាប្រធានគណបក្សប្រឆាំងដ៏សំខាន់របស់បក្សបង់ក្លាដែសជាតិ (BNP) ។ អ្នកនាំពាក្យគណបក្ស នេះ បានប្រាប់សារព័ត៌មាន AFP កាលពីថ្ងៃអង្គារថា ពេលនេះ លោកស្រី ត្រូវបានដោះលែងឲ្យមានសេរីភាពវិញហើយ។

លោកស្រី មានសុខភាពមិនល្អ អង្គុយលើរទេះរុញ រួមរឹតដោយជំងឺរលាកសន្លាក់រ៉ាំរ៉ៃ ជំងឺទឹកនោមផ្អែម និងជំងឺថ្លើម៕