ជនសង្ស័យបង្កកុបកម្មស្តាំនិយម បានបង្ហាញខ្លួននៅក្នុងតុលាការចក្រភពអង់គ្លេស កាលពីថ្ងៃអង្គារ ទី៦ សីហា ខណៈរដ្ឋាភិបាលចក្រភពអង់គ្លេសបាននិយាយថា នគរបាលជំនាញចំនួន៦.០០០នាក់ បានត្រៀមខ្លួន ដើម្បីទប់ទល់ជាមួយនឹងភាពគ្មានរបៀបរៀបរយដ៏អាក្រក់បំផុតនៅប្រទេសអង់គ្លេស ក្នុងរយៈពេលជាងមួយទសវត្សរ៍កន្លងទៅនេះ។

មនុស្សជិត៤០០នាក់ត្រូវបានចាប់ខ្លួន និង១០០នាក់ ត្រូវបានចោទប្រកាន់ជុំវិញការរំខានរយៈពេលមួយសប្តាហ៍ ដែលបង្កឡើងដោយព័ត៌មានមិនពិតតាមបណ្តាញអ៊ីនធឺណិត អំពីឃាតកម្មលើកុមារបីនាក់ នៅក្នុងការចាក់សម្លាប់ទ្រង់ទ្រាយធំមួយ។

នាយករដ្ឋមន្ត្រី លោក Keir Starmer បានដឹកនាំកិច្ចប្រជុំបន្ទាន់ជាលើកទីពីររបស់លោក ខណៈកងកម្លាំងនគរបាលនៅទូទាំងប្រទេស បានត្រៀមទប់ទល់អំពើហិង្សាដែលអាចកើតមានបន្ថែមទៀត។ ភាពវឹកវរនេះ បានកើតឡើងអាក្រក់បំផុតនៅចក្រភពអង់គ្លេស ចាប់តាំងពីកុបកម្មនៅទីក្រុងឡុងដ៍ ឆ្នាំ ២០១១ ដែលបាននាំឱ្យប្រទេសមួយចំនួនព្រមានប្រជាជនរបស់ពួកគេ អំពីគ្រោះថ្នាក់នៃការធ្វើដំណើរនៅក្នុងចក្រភពអង់គ្លេស។

កុបកម្ម នៅក្នុងទីក្រុងជាច្រើន បានមើលឃើញក្រុមបាតុករគប់ដុំថ្ម និងអណ្តាតភ្លើង ដាក់ទៅលើក្រុមមន្ត្រីនគរបាល ដុតរថយន្ត និងវាយប្រហារវិហារអ៊ីស្លាម និងសណ្ឋាគារយ៉ាងតិចចំនួនពីរកន្លែង ដែលត្រូវបានប្រើប្រាស់ជាកន្លែងស្នាក់នៅសម្រាប់អ្នកស្វែងរកសិទ្ធិជ្រកកោន។

លោក Starmer អតីតប្រធានរដ្ឋអាជ្ញា បានសន្យាថានឹងរកយុត្តិធម៌ឲ្យបានយ៉ាងឆាប់រហ័ស ហើយអ្នកប្រព្រឹត្តជាច្រើននាក់តាមដែលបានចោទប្រកាន់ បាននាំយកមកកាត់ទោសនៅចំពោះមុខចៅក្រម កាលពីថ្ងៃអង្គារ ដោយមានការផ្តល់ចម្លើយពីភាពមានទោសមួយចំនួន។