អង្គការសុខភាពពិភពលោក បាននិយាយកាលពីថ្ងៃអង្គារ ទី៦ សីហា ថា អត្តពលិកជាង៤០នាក់ នៅក្នុងព្រឹត្តិការណ៍កីឡាអូឡាំពិកទីក្រុងប៉ារីស បានធ្វើតេស្តវិជ្ជមានវីរុស COVID-19 ដែលបង្ហាញពីការកើនឡើងជាសកលថ្មីនៃករណីនេះ ខណៈការគ្របដណ្តប់នៃការចាក់វ៉ាក់សាំង បានធ្លាក់ចុះ។

អង្គការសុខភាពពិភពលោក(WHO) បាននិយាយថា វីរុស នៅពីក្រោយជំងឺរាតត្បាតជំងឺកូវីដ-១៩ នៅតែកំពុងធ្វើចរាចរ ហើយប្រទេសនានា ចាំបាច់ត្រូវពង្រឹងប្រព័ន្ធឆ្លើយតបរបស់ពួកគេ និងចាក់វ៉ាក់សាំងអ្នកទាំងឡាយណាដែលមានហានិភ័យបំផុត។

អត្តពលិកល្បីៗជាច្រើននាក់ បានឆ្លងវីរុស COVID-19 នៅក្នុងព្រឹត្តិការណ៍កីឡាទីក្រុងប៉ារីសឆ្នាំ ២០២៤នេះ។ អ្នកនៅក្នុងក្រុម បាននិយាយថា កីឡាករហែលទឹកជនជាតិអង់គ្លេស លោក Adam Peaty បានធ្វើតេស្តវិជ្ជមានវីរុស COVID-19 មួយថ្ងៃបន្ទាប់ពីឈ្នះមេដាយប្រាក់ក្នុងវិញ្ញាសា ១០០ម៉ែត្រ នៅពេលនោះលោកមានអាការៈមិនស្រួលខ្លួន។ កីឡាការីនី អូស្ត្រាលីសង្ឃឹម នាង Lani Pallister បានដកខ្លួនចេញពីវិញ្ញាសាហែលទឹកបែបសេរីចម្ងាយ១៥០០ម៉ែត្រផ្នែកនារី ក្រោយធ្លាក់ខ្លួនឈឺ។

លោកស្រី Maria Van Kerkhove នាយកបង្ការជំងឺរាតត្បាតរបស់អង្គការសុខភាពពិភពលោក បាននិយាយថា ជំងឺ COVID-19 នៅតែមានច្រើនជាមួយយើង។ វីរុសនេះ កំពុងធ្វើចរាចរនៅគ្រប់ប្រទេសទាំងអស់។ លោកស្រី បាននិយាយនៅក្នុងសន្និសីទសារព័ត៌មានថា ទិន្នន័យពីប្រទេសចំនួន៨៤ប្រទេស បង្ហាញថាភាគរយនៃការធ្វើតេស្តវិជ្ជមាន SARS-CoV-2 ជាវីរុសដែលបង្កជំងឺ COVID-19 បានកើនឡើងក្នុងរយៈពេលជាច្រើនសប្តាហ៍មកនេះ។