ក្រសួងយុត្តិធម៌អាមេរិក បាននិយាយកាលពីថ្ងៃអង្គារ (០៦ សីហា) ថា បុរសជនជាតិប៉ាគីស្ថានម្នាក់ដែលមានទំនាក់ទំនងនឹងអ៊ីរ៉ង់ ត្រូវបានចោទប្រកាន់នៅសហរដ្ឋអាមេរិក ពាក់ព័ន្ធនឹងការប៉ុនប៉ងធ្វើឃាតដែលត្រូវបានគេលាតត្រដាងលើអ្នកនយោបាយអាមេរិក ឬមន្ត្រីរដ្ឋាភិបាល។

ជនសង្ស័យ អាសីហ្វ មើឆាន (Asif Merchant) វ័យ ៤៦ឆ្នាំ បានជួលមនុស្សនៅអាមេរិកដើម្បីអនុវត្តផែនការនោះនៅក្នុងការសងសឹកដែលអាមេរិក សម្លាប់មេបញ្ជាការកំពូលរបស់កងឆ្មាំបដិវត្តន៍អ៊ីរ៉ង់ លោក កាសេម សូលេម៉ានី (Qassem Soleimani) ក្នុងឆ្នាំ២០២០ នេះបើយោងតាមពាក្យបណ្តឹងព្រហ្មទណ្ឌ។

អតីតប្រធានាធិបតី Donald Trump ដែលពេលលោកនៅជាប្រធានាធិបតីបានយល់ព្រមលើការវាយប្រហារយានដ្រូនលើលោក Soleimani ត្រូវបានពិភាក្សាថាជាគោលដៅដ៏មានសក្តានុពល ប៉ុន្តែគម្រោងដែលត្រូវបានលាតត្រដាងនោះមិនត្រូវបានគេគិតថាជាផែនការធ្វើឃាតលោក Trump នោះទេ នេះបើយោងតាមប្រភពដែលដឹងពីបញ្ហានេះ។

ជនសង្ស័យ Merchant ដែលរដ្ឋអាជ្ញាចោទប្រកាន់ថាបានចំណាយពេលនៅក្នុងប្រទេសអ៊ីរ៉ង់ មុនធ្វើដំណើរទៅអាមេរិកពីប៉ាគីស្ថាន ត្រូវបានចោទពីបទស៊ីឈ្នួលមនុស្សឃាត នៅក្នុងតុលាការសហព័ន្ធនៅតំបន់ ប្រុកខ្លីន (Brooklyn) នៃទីក្រុងញូវយ៉ក ហើយលោកត្រូវបានបញ្ជាឱ្យឃុំខ្លួនកាលពីថ្ងៃទី១៧ ខែកក្កដា។

ឯកសារតុលាការមិនបានដាក់ឈ្មោះគោលដៅនៃផែនការនោះទេ គ្រាន់តែបានបង្ហាញថា លោក Merchant បានប្រាប់សមត្ថកិច្ចបង្កប់ខ្លួនថា នឹងមាន «សន្តិសុខជាច្រើននៅជុំវិញ« គោលដៅមួយនោះ៕