បុគ្គលិកកងទ័ពអាកាសប្រទេសឥណ្ឌា និងអាល្លឺម៉ង់ កាលពីថ្ងៃអង្គារ បានធ្វើសមយុទ្ធការពារដែនអាកាសរួមគ្នា រវាងប្រទេសទាំងពីរ នៅក្នុងទីក្រុង កូមបាទ័រ(Coimbatore) រដ្ឋ Tamil Nadu ភាគខាងត្បូង ប្រទេសឥណ្ឌា។

សមយុទ្ធពហុភាគីរយៈពេល៧ថ្ងៃ កំពុងត្រូវបានរៀបចំឡើងដោយប្រទេសឥណ្ឌា ជាមួយបណ្តាប្រទេសមួយចំនួនទៀត រួមមានប្រទេសបារាំង អាល្លឺម៉ង់ អេស្ប៉ាញ និងចក្រភពអង់គ្លេស ដោយចូលរួមដើម្បីបង្ហាញពីជំនាញប្រយុទ្ធ និងអន្តរប្រតិបត្តិការរបស់ពួកគេ។

ការហោះហើរក្នុងសមយុទ្ធ ជាលើកដំបូងនៅក្នុងប្រទេសឥណ្ឌា មេបញ្ជាការកងទ័ពអាកាសអាល្លឺម៉ង់ លោក Ingo Gerhartz បាននិយាយថា ការចូលរួមជាមួយបណ្តាប្រទេសអឺរ៉ុបជាច្រើន មានការចាប់អារម្មណ៍ខ្លាំង។

មេបញ្ជាការកងទ័ពអាកាសប្រទេសឥណ្ឌា បាននិយាយថា វាគឺជាសក្ខីភាពមួយ ចំពោះភាពជឿជាក់របស់យើង ដែលមេឃតែមួយ អាចជាវេទិកា ដើម្បីជំរុញការជឿទុកចិត្ត និងបង្កើនអន្តរប្រតិបត្តិការ។

ប្រទេសឥណ្ឌា បានបង្ហាញយន្តហោះចម្បាំងផលិតក្នុងស្រុកជាច្រើនគ្រឿង រួមទាំងយន្តហោះ Tejas យន្តហោះ រ៉ាហ្វាលឺស(Rafale) និងយន្តហោះមិច២៩(MIG 29) នៅក្នុងការធ្វើសមយុទ្ធនេះ។