ប្រធានាធិបតីប្រទេសវេណេស៊ុយអេឡា លោក Nicolas Maduro បាននិយាយថា លោកមិនខ្វល់ពីមតិរបស់រដ្ឋាភិបាលសហរដ្ឋអាមេរិក ទាក់ទងទៅនឹងការបោះឆ្នោតប្រធានាធិបតីកាលពីខែកក្កដា ដែលមានភាពចម្រូងចម្រាសនៅក្នុងប្រទេសវេណេស៊ុយអេឡា នោះទេ។

ការអះអាងរបស់ប្រធានាធិបតី លោក Nicolas Maduro ថា លោកបានទទួលជ័យជម្នះសម្រាប់អាណត្តិទី៣ នៅក្នុងការបោះឆ្នោតកាលពីថ្ងៃទី២៨ ខែកក្កដា បានបង្កឱ្យមានការតវ៉ាដោយកំហឹង ពីប្រជាជនវេណេស៊ុយអេឡា នៅទូទាំងប្រទេស កាលពីសប្តាហ៍មុន ដោយទាមទារឱ្យលោក Maduro ចុះចេញពីតំណែង ហើយលោក Gonzalez ជាអ្នកទទួលជ័យជម្នះនេះ។

អាជ្ញាធររៀបចំការបោះឆ្នោតរបស់ប្រទេសវេណេស៊ុយអេឡា ដែលក្រុមប្រឆាំងនិយាយថា គាំទ្រដល់អ្នកសង្គមនិយមដែលកំពុងកាន់អំណាច បាននិយាយថា លោក Maduro បានជាប់ឆ្នោតជាថ្មី ដោយទទួលបានសំឡេងឆ្នោតប្រហែល ៥១% និងធ្វើឲ្យលោក Gonzalez បរាជ័យ ។ គណបក្សប្រឆាំងនិយាយថា ចំនួនសរុបលម្អិតរបស់ខ្លួនបង្ហាញថា លោក Gonzalez ទំនងជាទទួលបានសំឡេងឆ្នោត ៦៧% ក្នុងការបោះឆ្នោត។

រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីសប្តាហ៍មុនថា មាន «ភស្តុតាងដ៏លើសលប់» ពីជ័យជម្នះរបស់ លោក Gonzalez ហើយទីក្រុងវ៉ាស៊ីនតោន បានទទួលស្គាល់លោក ជាអ្នកទទួលជ័យជម្នះក្នុងការបោះឆ្នោតនេះ។

ប្រទេសរុស្ស៊ី និងចិន ស្ថិតក្នុងចំណោមប្រទេសផ្សេងទៀត បានអបអរសាទរលោក Maduro ជាអ្នកទទួលជ័យជម្នះក្នុងការបោះឆ្នោត ប៉ុន្តែបណ្តាប្រទេសលោកខាងលិចភាគច្រើនបានបដិសេធ ដោយអំពាវនាវឱ្យមានការចេញផ្សាយលទ្ធផលបោះឆ្នោតពេញលេញ។