ក្រសួងការពារជាតិរុស្ស៊ី បាននិយាយថា ទីក្រុងគីវ បានបន្តការវាយប្រហារតាមផ្លូវអាកាសទៅលើតំបន់ព្រំដែន ឃើកស្ក៍ (Kursk) របស់រុស្ស៊ី នៅថ្ងៃពុធ (០៧ សីហា) នេះដោយប្រព័ន្ធការពារអាកាសបានបំផ្លាញយានដ្រូនចំនួន ៤គ្រឿងក្នុងពេលពេញមួយយប់ មួយថ្ងៃបន្ទាប់ពីទីក្រុងមូស្គូ បានចោទប្រកាន់អ៊ុយក្រែន ថាបានកំណត់គោលដៅលើតំបន់នោះជាមួយនឹងការវាយលុកដោយគ្រឿងយុទ្ធោបករណ៍ពាសដែក។

ក្រសួងបានបញ្ជូនទ័ពបំរុងកាលពីថ្ងៃអង្គារ ដើម្បីជួយបណ្តេញយុទ្ធជនអ៊ុយក្រែនរាប់រយនាក់ដែលគាំទ្រដោយរថក្រោះពីតំបន់ Kursk នៅក្នុងការវាយលុកជើងគោកដែលមានទ្រង់ទ្រាយធំបំផុតមួយចូលទៅក្នុងទឹកដីរុស្ស៊ី អំឡុងពេលសង្រ្គាមដែលឥឡូវនេះមានអាយុកាលជាង ២ឆ្នាំ។

លោក អាឡិចស៊ី ស្មៀនូវ (Alexei Smirnov) អភិបាលស្តីទីនៃតំបន់ភាគនិរតីរបស់រុស្ស៊ីមួយនេះបាននិយាយនៅក្នុងការបង្ហោះលើកម្មវិធីផ្ញើសារតេលេក្រាមថា៖ ស្ថានការណ៍ស្ថិតក្រោមការគ្រប់គ្រងហើយនៅពេលនេះ។ សាររបស់លោក Smirnov បានបង្ហាញថា តំបន់នេះស្ថិតនៅក្រោមការជូនដំណឹងអំពីការវាយឆ្មក់តាមអាកាសរាប់សិបដងក្នុងរយៈពេល ២៤ម៉ោងកន្លងមក។ គិតត្រឹមព្រឹកថ្ងៃពុធនេះ មិនមានសេចក្តីរាយការណ៍ពីការប្រយុទ្ធគ្នាជើងគោកថ្មីនោះទេ។

មន្ត្រីរុស្ស៊ីបាននិយាយថា មនុស្ស ៥នាក់ស្លាប់ រួមទាំងបុគ្គលិករថយន្តគិលានសង្គ្រោះ ២នាក់ ហើយយ៉ាងហោចណាស់ ២០នាក់បានរងរបួស ក្នុងចំណោមនោះមាន ៦នាក់ជាកុមារ នៅក្នុងការប្រយុទ្ធគ្នាដែលបានផ្ទុះឡើងកាលពីថ្ងៃអង្គារ។ អ៊ុយក្រែនមិនបានធ្វើអត្ថាធិប្បាយជាផ្លូវការទេ ទោះបីជាមានភស្តុតាងនៃសកម្មភាពយោធាមួយចំនួនពីខាងព្រំដែនរបស់ខ្លួនក៏ដោយ។ ទាំងទីក្រុងគីវ និងទីក្រុងមូស្គូ និយាយថា ការវាយប្រហាររបស់ពួកគេមិនសំដៅលើជនស៊ីវិលឡើយ៕