ប្រភពពីមន្ត្រីយោធាដែលដឹងពីការពិភាក្សាបានប្រាប់សារព័ត៌មានរ៉យទ័រថា នៅយប់មុនពេលមេដឹកនាំដ៏យូររបស់បង់ក្លាដែស លោកស្រី សេក ហាស៊ីណា (Sheikh Hasina) បានភៀសខ្លួនចេញពីប្រទេសភ្លាមៗស្របពេលមានការតវ៉ាដ៏ហិង្សានោះ ប្រមុខទ័ពរបស់លោកស្រីបានជួបជាមួយបណ្ដាឧត្តមសេនីយ ហើយបានសម្រេចចិត្តថា កងទ័ពនឹងមិនបើកការបាញ់ប្រហារទៅលើជនស៊ីវិលដើម្បីអនុវត្តបម្រាមគោចរឡើយ ហើយទាហាននឹងមិនអាចអនុវត្តការបិទខ្ទប់ដែលលោកស្រីស្នើឡើងបានទេ។

សារនោះបញ្ជាក់ច្បាស់ណាស់ថាលោកស្រី Hasina លែងមានការគាំទ្រពីកងទ័ពទៀតហើយ។ បញ្ហានេះជួយពន្យល់ពីមូលហេតុដែលការគ្រប់គ្រងរយៈពេល ១៥ឆ្នាំរបស់លោកស្រី Hasina ក្នុងពេលដែលជួបការខ្វែងគំនិតតិចតួច បានឈានដល់ភាពវឹកវរដ៏ធំ និងបញ្ចប់ការដឹកនាំភ្លាមៗកាលពីថ្ងៃចន្ទ (០៥ សីហា) និងបានភៀសខ្លួនពីបង់ក្លាដែស ទៅកាន់ប្រទេសឥណ្ឌា។

ប្រមុខទ័ពបង់ក្លាដែស លោកឧត្តមសេនីយ៍ វេកឃើ អូស ហ្សាម៉ាន (Waker-Uz-Zaman) មិនបានពន្យល់ជាសាធារណៈអំពីការសម្រេចចិត្តឈប់គាំទ្រលោកស្រី Hasina នេះទេ ប៉ុន្តែទំហំនៃការតវ៉ា និងចំនួនអ្នកស្លាប់រាប់រយនាក់បានធ្វើឱ្យការបន្តគាំទ្រចំពោះលោកស្រី Hasina ត្រូវតបស្នងក្នុងតម្លៃខូចខាតដ៏ធំ នេះបើតាមប្រភពជាន់ខ្ពស់ក្នុងកងទ័ព។

អ្នកនាំពាក្យកងទ័ពបង់ក្លាដែសបាននិយាយថា ឧត្តមសេនីយ៍បានប្រកាសថាជីវិតមនុស្សត្រូវតែទទួលបានការការពារ ហើយបានអំពាវនាវឱ្យមន្ត្រីរបស់លោកបង្ហាញការអត់ធ្មត់។ នេះជាការបង្ហាញដំបូងដែលថាកងទ័ពបង់ក្លាដែស នឹងមិនបង្រ្កាបបាតុកម្មដោយហិង្សានេះទេទោះភាពតានតឹងនៅតែបន្ត ដោយនោះជាកត្តាជំរុញលើការបរាជ័យរបស់លោកស្រី Hasina៕