យោងតាមក្រសួងសេដ្ឋកិច្ច និងឧស្សាហកម្មអ៊ីស្រាអែល បាននិយាយឲ្យដឹងថា អ៊ីស្រាអែល បានធ្វើសមយុទ្ធមួយ កាលពីថ្ងៃអង្គារ ដើម្បីត្រៀមសម្រាប់ការចែកចាយកញ្ចប់អាហារសង្គ្រោះបន្ទាន់ ក្នុងករណីមានជម្លោះកើនឡើង។

សមយុទ្ធនេះមានឈ្មោះថា «Bread of the Land» ពាក់ព័ន្ធទៅនឹងការត្រួតពិនិត្យសារពើភ័ណ្ឌ និងការត្រៀមកញ្ចប់អាហារ ដែលរក្សាទុកនៅក្នុងសាខាសង្គ្រោះបន្ទាន់ នៃបណ្តាញផ្សារទំនើបធំៗរបស់ប្រទេសអ៊ីស្រាអែល។

អ៊ីស្រាអែល ក៏បានសាកល្បងវិធីសាស្រ្តសម្រាប់ការដឹកជញ្ជូនកញ្ចប់ជំនួយទាំងនេះ ទៅកាន់មជ្ឈមណ្ឌលចែកចាយ ដែលត្រូវការ។

អ៊ីស្រាអែល មានសាខាផ្សារទំនើបសង្គ្រោះបន្ទាន់ជាង៤២០កន្លែង ដោយមានកញ្ចប់អាហាររាប់ម៉ឺនកញ្ចប់ និងផលិតផលប្រើប្រាស់ជាមូលដ្ឋានផ្សេងទៀត ដែលត្រៀមរួចជាស្រេចសម្រាប់ការចែកចាយភ្លាមៗ ដល់ប្រជាជនដែលពុំអាចចាកចេញពីលំនៅឋានរបស់ពួកគេ។

កញ្ចប់អាហាររួមមាន នំប៉័ង នំកញ្ចប់ ទឹកដោះគោ កាហ្វេ តែ ស្ករ អាហារសម្រាប់ទារក បន្លែកំប៉ុង ត្រីធូណា និងរបស់ចាំបាច់ផ្សេងៗទៀត។

ក្រសួង បានបញ្ជាក់ថា បច្ចុប្បន្ននេះ ពុំមានការខ្វះស្បៀងអាហារនៅក្នុងឃ្លាំងនោះទេ ហើយក៏មិនចាំបាច់ឱ្យសាធារណជនទិញលើសពីអ្វីដែលត្រូវការក្នុងរយៈពេលតែពីរ បី ថ្ងៃ នោះដែរ ។