​​អ៊ីស្រាអែល៖ ក្រុម​វេជ្ជបណ្ឌិត​អ៊ីស្រាអែល​និយាយ​ថា ​ពួកគេ​បាន​ធ្វើ​ការ​វះកាត់​ដ៏​ស្មុគស្មាញ​ដើម្បី​បំបែក​កូនភ្លោះ​ខ្លួន​ជាប់​គ្នា​មាន​អាយុ​មួយ​ឆ្នាំ ដែល​ជា​កិច្ច​ខិតខំ​ប្រឹងប្រែង​ដំបូង​បំផុត​មិន​ធ្លាប់​មាន​នៅ​ក្នុង​ប្រទេស​អ៊ីស្រាអែល​។​

​មជ្ឈមណ្ឌល​នេះ​បាន​និយាយ​នៅ​ក្នុង​សេចក្ដីថ្លែងការណ៍​មួយ ​ផ្ញើ​ទៅ​ទីភ្នាក់ងារសារព័ត៌មាន AP ថា​ ក្មេង​ស្រី​ភ្លោះ​ទាំងពីរ​ត្រូវ​បាន​វះកាត់​ញែក​ចេញពី​គ្នា​ ដោយ​ចំណាយ​រយៈពេល ១២ម៉ោង​ដោយ​ក្រុម​អ្នក​ជំនាញ​ផ្នែក​វេជ្ជសាស្ត្រ​អ៊ីស្រាអែល និង​អន្តរជាតិ​នៅ​ឯ​មជ្ឈមណ្ឌល​វេជ្ជសាស្ត្រ Soroka ក្នុង​ទីក្រុង Beersheba ភាគ​ខាងត្បូង​ប្រទេស​អ៊ីស្រាអែល​។ លោក​វេជ្ជបណ្ឌិត Mickey Gideon ប្រធាន​ផ្នែក​វះកាត់​ជំងឺ​កុមារ​នៅ​មជ្ឈមណ្ឌល​វេជ្ជសាស្ត្រ Soroka បាន​និយាយ​ថា​ “ដើម្បី​សេចក្តី​រីករាយ​ដ៏​ធំធេង​របស់​យើង អ្វីៗ​គ្រប់យ៉ាង​បាន​ប្រព្រឹត្តទៅ​ដូចដែល​យើង​សង្ឃឹម​”។​

​កូនភ្លោះ​នេះ​បាន​កើត​កាលពី​ខែ​សីហា​ឆ្នាំមុន​នៅ​ក្នុង​មន្ទីរពេទ្យ ​Soroka​។ ក្រុម​គ្រូពេទ្យ​បាន​រៀប​ដំណើរ​ការវះកាត់​នេះ​ពេញ​មួយ​ឆ្នាំ​។​ សេចក្ដីថ្លែងការណ៍​របស់​មជ្ឈមណ្ឌល​វេជ្ជសាស្ត្រ Soroka បាន​និយាយ​ថា ​រយៈពេល​ជាច្រើន​ខែ​មុន​ពេល​វះកាត់​កូនភ្លោះ​នេះ ​ត្រូវ​បាន​បណ្ដុះ​ស្បែក​បន្ថែម​ដើម្បី​ឲ្យ​ស្បែក​យឺត ឬ​យា និង​បិទ​ស្បែក​លលា​ក្បាល​បន្ទាប់ពី​ការវះកាត់​។ សេចក្ដីថ្លែងការណ៍​ខាងលើ​បាន​និយាយ​ថា ​ក្រុម​គ្រូពេទ្យ​បាន​ប្រើ​គំរូ 3D និង​គំរូ​ជាក់​ស្តែង​ដើម្បី​បង្ហាញ​ពី​នីតិវិធី​ស្មុគស្មាញ​៕

អត្ថបទ៖ សុខមាន