អាកាសយានដ្ឋានអន្តរជាតិ Beirut ដែលជាអាកាសយានដ្ឋានអន្តរជាតិតែមួយគត់ នៅក្នុងប្រទេសលីបង់ បាន និងកំពុងមមាញឹកក្នុងការគ្រប់គ្រងដោះស្រាយជាមួយអ្នកដំណើរ រយៈពេលប៉ុន្មានថ្ងៃថ្មីៗនេះ ចំពេលមានភាពតានតឹងក្នុងតំបន់ កើនឡើង។

យ៉ាងហោចណាស់មានប្រទេសចំនួន១៥ ក្នុងនោះរួមទាំងសហរដ្ឋអាមេរិក និងបារាំងផងដែរ បានជំរុញឲ្យពលរដ្ឋរបស់ពួកគេចាកចេញពីលីបង់ ហើយជៀសវាងការធ្វើដំណើរទៅកាន់ប្រទេសនេះ។

គេឃើញមនុស្សជាក្រុមៗ រង់ចាំនៅសាលចេញដំណើរ ដើម្បីឲ្យត្រួតពិនិត្យឯកសារពាក់ព័ន្ធ ហើយចាកចេញពីប្រទេសនេះ តែក៏នៅមានអ្នកខ្លះត្រឡប់មកពីបរទេស ដើម្បីទៅជួបជុំសមាជិកគ្រួសាររបស់ខ្លួន ក្នុងគ្រាដ៏ចលាចលនេះដែរ។

អ្នកដំណើរម្នាក់ឈ្មោះ Rebacca ដែលត្រឡប់ទៅកាន់ទីក្រុងបេរូត បាននិយាយថា៖ «ខ្ញុំត្រឡប់មកប្រទេសលីបង់វិញ (ចាកចេញពីទីក្រុងឌូបៃ) ដើម្បីមកសម្រាកវិស្សមកាល។ មនុស្សទាំងអស់ នៅជុំវិញខ្ញុំ បានប្រាប់ខ្ញុំថា កុំត្រឡប់មកលីបង់អី ប៉ុន្តែនេះគឺជាស្រុកកំណើតរបស់ខ្ញុំ ហើយខ្ញុំចង់ត្រឡប់មកវិញ ព្រោះខ្ញុំនឹកឪពុកម្តាយរបស់ខ្ញុំ។ ជើងហោះហើរត្រូវបានកែសម្រួល ជាញឹកញាប់។ តាមពិត ខ្ញុំត្រូវត្រលប់មកវិញ តាំងពីម្សិលមិញ ប៉ុន្តែត្រូវបានពន្យារពេលមកថ្ងៃនេះវិញ»។

គួរបញ្ជាក់ថា ការប្រឈមមុខដាក់គ្នា រវាងក្រុមប្រដាប់អាវុធរបស់លីបង់ គឺក្រុមហេសបូឡា និងអ៊ីស្រាអែលបានកើនឡើងយ៉ាងខ្លាំង នាពេលថ្មីៗនេះ បន្ទាប់ពីអ៊ីស្រាអែលបានចោទក្រុមហេសបូឡាថា បានវាយប្រហារទីលានបាល់ទាត់ ក្នុងទីក្រុង Majdal Shams នៅតំបន់កាន់កាប់ Golan Heights ដោយការវាយប្រហារនោះបានសម្លាប់មនុស្សរាប់សិបនាក់។

ហើយអ៊ីស្រាអែលបានសងសឹកវិញដោយការបាញ់មីស៊ីលចំនួន ៣គ្រាប់ កាលពីល្ងាចថ្ងៃអង្គារសប្ដាហ៍កន្លងទៅ នៅជាយក្រុងភាគខាងត្បូងក្រុងបេរូត ដោយបានសម្លាប់លោក Fouad Shokor មេបញ្ជាការយោធាជាន់ខ្ពស់របស់ក្រុមហេសបូឡា និងជនស៊ីវិល ៧នាក់ផ្សេងទៀត៕