នគរបាល នៅថ្ងៃពុធ (ទី៧ ខែសីហា) នេះ បានប្រាប់ឲ្យដឹងថា ផ្នែកនៃសណ្ឋាគារមួយ នៅភាគខាងលិចប្រទេសអាល្លឺម៉ង់ បានបាក់រលំ ដោយបានបណ្តាលឲ្យមនុស្សម្នាក់ស្លាប់ ហើយ ៨នាក់ផ្សេងទៀត ត្រូវបានគេជឿថា ជាប់នៅក្នុងគនរបាក់បែក។

មានមនុស្ស ១៤នាក់ នៅក្នុងសណ្ឋាគារ ក្នុងទីក្រុង Kroev ដែលជាទីក្រុងតូចមួយនៅមាត់ទន្លេ Mosel នៅពេលដែលអាគារមួយជាន់ បានបាក់រលំ នៅវេលាម៉ោងប្រហែល ១១យប់ថ្ងៃអង្គារ (ទី៦ ខែសីហា)។ នគរបាលបាននិយាយថា មនុស្ស ៥នាក់ អាចចេញពីអគារដោយមិនរងរបួស ប៉ុន្តែមនុស្ស ៩នាក់ផ្សេងទៀត ត្រូវបានជាប់នៅក្នុងនោះ។

រហូតមកទល់ព្រឹកថ្ងៃពុធនេះ សេវាសង្គ្រោះបន្ទាន់ បានរកឃើញថា មនុស្សម្នាក់បានស្លាប់ហើយ ប៉ុន្តែមិនទាន់អាចយកសពបាននៅឡើយទេ។ នគរបាលបាននិយាយនៅក្នុងសេចក្តីថ្លែងការណ៍មួយថា ពួកគេបានទាក់ទងជាមួយមនុស្សមួយចំនួន ក្នុងចំណោមមនុស្ស ៨នាក់ដែលគេជឿថា នៅតែស្ថិតនៅក្នុងអគារ ហើយខ្លះទៀតបានរងរបួសធ្ងន់ធ្ងរ។

អាជ្ញាធរបានជម្លៀសមនុស្ស ៣១នាក់ចេញពីតំបន់ភ្លាមៗ នៅជុំវិញអគារដែលរងការខូចខាតនោះ។ ភ្លាមៗ ពុំទាន់មានការបញ្ជាក់ពីមូលហេតុដែលបណ្តាលឲ្យបាក់រលំសណ្ឋាគារនេះនៅឡើយទេ៕