មន្ត្រីមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារថា ការផ្គត់ផ្គង់សង្គ្រោះជីវិតបានត្រៀមរួចរាល់ នៅក្នុងកំពង់ផែរបស់ប្រទេសស៊ូដង់ សម្រាប់បញ្ជូនទៅកាន់ជំរំ Zamzam នៅ រដ្ឋ North Darfur ជាកន្លែងដែលក្រុមមន្ត្រី បានប្រកាសថា ស្ថានភាពទុរ្ភិក្សកើតមានឡើង។

ទោះជាយ៉ាងណា លោកស្រី Edem Wosornu នាយកផ្នែកប្រតិបត្តិការនិងគាំទ្រនៃការិយាល័យសម្រាប់ការសម្របសម្រួលកិច្ចការមនុស្សធម៌អង្គការសហប្រជាជាតិ (OCHA) បាននិយាយថា ការដឹកជញ្ជូនរួមមានថ្នាំពេទ្យសំខាន់ៗ ការផ្គត់ផ្គង់អាហារូបត្ថម្ភ ឱសថបន្សុទ្ធទឹកស្អាត និងសាប៊ូ កំពុងរង់ចាំការអនុម័ត និងការធានាសុវត្ថិភាព ដែលត្រូវការជាមុន ដើម្បីអាចដឹកជញ្ជូនបាន។

ក្នុងអំឡុងពេលសន្និសីទរបស់ក្រុមប្រឹក្សាសន្តិសុខស្តីពីស្ថានភាពមនុស្សធម៌ក្នុងប្រទេសស៊ូដង់ លោកស្រី បាននិយាយទៅកាន់សមាជិកថា វាមានសារៈសំខាន់ខ្លាំងដែលការអនុញ្ញាតយ៉ាងឆាប់រហ័សត្រូវបានផ្តល់ឲ្យសម្រាប់ដំណើរការផ្គត់ផ្គង់ ពីកំពង់ផែស៊ូដង់ទៅកាន់ជំរំនៅជិតរដ្ឋធានីនៃរដ្ឋ North Darfur គឺរដ្ឋធានី El Fasher ។ 

កិច្ចប្រជុំរបស់ក្រុមប្រឹក្សានេះ បានធ្វើឡើងតែប៉ុន្មានថ្ងៃ បន្ទាប់ពីគណៈកម្មាធិការពិនិត្យគ្រោះទុរភិក្ស បានសន្និដ្ឋានថា ស្ថានភាពគ្រោះទុរ្ភិក្ស កើតមាននៅក្នុងជំរំ Zamzam ។

ជំនួយការនាយកប្រតិបត្តិ លោក Stephen Omollo មកពីកម្មវិធីស្បៀងអាហារពិភពលោក (WFP) បាននិយាយទៅកាន់សមាជិកថា ទីភ្នាក់ងារនេះ កំពុងពង្រីកប្រតិបត្តិការយ៉ាងសំខាន់នៅទូទាំងប្រទេស ហើយកម្មវិធីស្បៀងអាហារពិភពលោក (WFP) នឹងផ្តល់អាទិភាពដល់ប្រជាជនដែលអាចចូលទៅដល់ខណៈកំពុងប្រឈមមុខទៅនឹងកម្រិតនៃភាពអត់ឃ្លានធ្ងន់ធ្ងរ រួមជាមួយអ្នកទាំងឡាយដែលបានភៀសខ្លួននៅខាងក្នុងប្រទេស។

មន្ត្រីនិយាយថា ជម្លោះត្រូវតែបញ្ឈប់ ហើយបទឈប់បាញ់នៅតែជាដំណោះស្រាយប្រកបដោយនិរន្តរភាពតែមួយគត់ ដើម្បីទប់ស្កាត់ការរីករាលដាលបន្ថែមទៀតនៃគ្រោះទុរ្ភិក្ស នៅក្នុងប្រទេសស៊ូដង់។