របាយការណ៍ពីក្រុមសិទ្ធិមនុស្សអ៊ីស្រាអែល B'Tselem បាននិយាយកាលពីថ្ងៃចន្ទថា អ៊ីស្រាអែល បានអនុវត្តន៍គោលនយោបាយជាប្រព័ន្ធនៃការបំពានអ្នកទោស និងធ្វើទារុណកម្ម ចាប់តាំងពីសង្រ្គាមបានផ្ទុះឡើងនៅតំបន់ហ្កាហ្សា ធ្វើឲ្យអ្នកទោសប៉ាឡេស្ទីន ក្លាយជាកម្មវត្ថុនៃអំពើឃោឃៅ ចាប់ពីអំពើហិង្សាយ៉ាងទំនើងចិត្ត រហូតដល់ការបំពានផ្លូវភេទ ។

ក្រុមមួយនេះ និយាយថា របាយការណ៍នេះ ផ្អែកលើបទសម្ភាសន៍ជាមួយជនប៉ាឡេស្ទីន ៥៥នាក់ មកពីតំបន់ហ្កាហ្សា តំបន់វ៉េសប៊ែង និងអ៊ីស្រាអែល ដែលត្រូវបានឃាត់ខ្លួននៅក្នុងពន្ធនាគារអ៊ីស្រាអែល ចាប់តាំងពីការវាយប្រហារថ្ងៃទី ៧ ខែតុលា ឆ្នាំ ២០២៣ លើតំបន់ភាគខាងត្បូងអ៊ីស្រាអែល ។

របាយការណ៍នេះ បានចេញរយៈពេលប៉ុន្មានថ្ងៃ ក្រោយយោធាអ៊ីស្រាអែលឃាត់ខ្លួនទាហាន ៩នាក់ ដែលរងការចោទប្រកាន់ថាបានបំពានធ្ងន់ធ្ងរលើអ្នកទោសនៅក្នុងមូលដ្ឋានយោធា ស្ថិតក្នុងតំបន់វាលខ្សាច់ Negev ។

យោងតាមការចេញសេចក្តីរាយការណ៍របស់សារព័ត៌មានអ៊ីស្រាអែល បានឲ្យដឹងថា ទាហានទាំងនេះ ត្រូវបានចោទប្រកាន់ថាបានបំពានផ្លូវភេទលើសមាជិកអង្គភាពវរជនហាម៉ាស់ ។

អ្នកនាំពាក្យម្នាក់របស់សេវាកម្មពន្ធនាគារអ៊ីស្រាអែល និយាយថា អ្នកទោសទាំងអស់ ត្រូវបានគេប្រព្រឹត្តលើដោយអនុលោមតាមច្បាប់ ហើយសិទ្ធិមូលដ្ឋានទាំងអស់ ត្រូវបានអនុវត្តន៍តាមដោយឆ្មាំគុកទទួលបានការបណ្តុះបណ្តាលវិជ្ជាជីវៈ ។

ដោយឡែក យោធាអ៊ីស្រាអែល ដែលគ្រប់គ្រងមន្ទីរឃុំឃាំងមួយចំនួន ជាទីដែលអ្នកទោសប៉ាឡេស្ទីន បានជាប់ខ្លួននៅទីនោះ និយាយថា ពួកគេប្រតិបត្តិការដោយអនុលោមតាមច្បាប់ជាមូលដ្ឋាន ហើយអំណះអំណាងនៃការបំពាន ត្រូវបានស៊ើបអង្កេត ៕