តុលាការក្នុងប្រទេសថៃនឹងសម្រេចនៅថ្ងៃទី៧ ខែសីហានេះ អំពីជោគវាសនារបស់គណបក្សប្រឆាំងដ៏លេចធ្លោ គឺគណបក្សបោះជំហានទៅមុខ (Move Forward) ក្នុងសំណុំរឿងដែលបានធ្វើឲ្យមានការភ័យខ្លាចពីការតស៊ូអំណាច រវាងអ្នកអភិរក្សដ៏មានឥទ្ធិពល និងគណបក្សជាប់ឆ្នោតដោយការជ្រើសរើសរបស់ប្រជាជន។

តុលាការធម្មនុញ្ញនឹងសម្រេចលើសំណើរបស់ស្ថាប័នបោះឆ្នោត ដើម្បីរំលាយគណបក្ស Move Forward ដែលជាអ្នកឈ្នះការបោះឆ្នោតឆ្នាំ២០២៣ បន្ទាប់ពីតុលាការដូចគ្នា កាលពីខែមករា បានរកឃើញថា យុទ្ធនាការរបស់គណបក្សនេះ ដើម្បីឲ្យធ្វើវិសោធនកម្មច្បាប់ការពាររបបរាជានិយមកុំឲ្យមានការរិះគន់ គឺខុសច្បាប់។

របៀបវារៈរបស់គណបក្ស Move Forward ទទួលបានការគាំទ្រយ៉ាងច្រើន ក្នុងចំណោមអ្នកបោះឆ្នោត ប៉ុន្តែវាបានប៉ះទង្គិចជាមួយទំនាក់ទំនងដ៏មានឥទ្ធិពលរបស់ប្រទេសថៃ គឺអ្នកអភិរក្ស និងយោធា ដែលការកែទម្រង់ច្បាប់ប្រមាថព្រះមហាក្សត្រ គឺជាជំហានឆ្ងាយពេកនៅក្នុងប្រទេសដែលអ្នករាជានិយមចាត់ទុករបបរាជានិយមថា ជាស្ថាប័នដ៏ខ្ពង់ខ្ពស់បំផុត។

គណបក្សនេះបដិសេធមិនបានធ្វើខុសនោះឡើយ ហើយត្រូវបានបញ្ជាឲ្យទម្លាក់យុទ្ធនាការ ពាក់ព័ន្ធនឹងច្បាប់ប្រមាថព្រះមហាក្សត្រ។ គណបក្សសង្ឃឹមថា ខ្លួននឹងរួចផុតពីការរំលាយ ដោយលើកហេតុផលថា បណ្ដឹងរបស់គណៈកម្មាធិការរៀបចំការបោះឆ្នោតមិនបានអនុវត្តតាមនីតិវិធីត្រឹមត្រូវនោះទេ៕