ក្រសួងការបរទេសលីប៊ី និងបេសកកម្មជំនួយព្រំដែនសហភាពអឺរ៉ុប(EUBAM) នៅក្នុងប្រទេសលីប៊ី កាលពីថ្ងៃអង្គារ បានពិភាក្សាអំពីឆមាសទី២នៃអាណត្តិទី៧ របស់បេសកកម្មស្តីពីការពង្រឹងសមត្ថភាពរបស់ប្រទេសលីប៊ី ក្នុងការការពារព្រំដែនរបស់ខ្លួន។

EUBAM បាននិយាយនៅក្នុងសេចក្តីថ្លែងការណ៍មួយថា នៅក្នុងកិច្ចប្រជុំនោះ ភាគីទាំងពីរ «បានចូលរួមក្នុងការសន្ទនាក្នុងន័យស្ថាបនា» ដោយផ្អែកលើការពិនិត្យឡើងវិញដ៏ទូលំទូលាយនៃកិច្ចការបេសកកម្ម និងបានយល់ព្រមលើអាទិភាពដែលបានកំណត់ជាទូទៅ។

ភាគីទាំងពីរ បានសាទរចំពោះ «លទ្ធផលវិជ្ជមាននៃកិច្ចសហប្រតិបត្តិការអន្តរទំនាក់ទំនង និងអន្តរកម្ម ក្នុងក្របខ័ណ្ឌនៃក្រុមការងារលើព្រំដែនគោក និងដែនសមុទ្រ ព្រមទាំងឧក្រិដ្ឋកម្មដែលមានអង្គការចាត់  តាំង។

នៅក្នុងខែឧសភា ឆ្នាំ ២០១៣ ក្រុមប្រឹក្សាសហភាពអឺរ៉ុប បានផ្តល់ភ្លើងខៀវសម្រាប់ EUBAM ដើម្បីគាំទ្រអាជ្ញាធរលីប៊ី ក្នុងការពង្រឹងសន្តិសុខនៅតាមព្រំដែននៃប្រទេសលីប៊ី។

អាណត្តិសំខាន់របស់ EUBAM គឺដើម្បីរួមចំណែកក្នុងការបង្កើនសមត្ថភាពរបស់អាជ្ញាធរ និងភ្នាក់ងារលីប៊ី ក្នុងការគ្រប់គ្រងព្រំដែនរបស់ប្រទេសលីប៊ី ប្រយុទ្ធប្រឆាំងនឹងឧក្រិដ្ឋកម្មឆ្លងព្រំដែន រួមទាំងការជួញដូរមនុស្ស និងការរត់ពន្ធជនអន្តោប្រវេសន៍ និងការប្រយុទ្ធប្រឆាំងនឹងអំពើភេរវកម្ម។ កាលពីថ្ងៃទី ២៦ ខែមិថុនា ឆ្នាំ ២០២៣ ក្រុមប្រឹក្សាសហភាពអឺរ៉ុប បានបន្តអាណត្តិ រហូតដល់ថ្ងៃទី ៣០ ខែមិថុនា ឆ្នាំ ២០២៥។