ភ្នំពេញ ៖ យោងតាមផេកFacebook របស់ក្រសួងពាណិជ្ជកម្មបានឱ្យដឹងថា នៅរសៀលថ្ងៃទី៧ ខែកញ្ញា ឆ្នាំ២០២១ នៅទីស្តីការក្រសួងពាណិជ្ជកម្ម ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជា បានជួបពិភាក្សាការងារទ្វេភាគីជាមួយ ឯកឧត្តម Gan Kim Yong រដ្ឋ​មន្ត្រី​ក្រសួងពាណិ ជ្ជកម្ម និងឧស្សាហកម្មសិង្ហបុរី តាមប្រព័ន្ធវីដេអូ។

ជំនួបពិភាក្សានេះ បានផោ្តតសំខាន់លើការពង្រឹងទំនាក់ទំនងពាណិជ្ជកម្មនិងវិនិយោគកម្ពុជា-សិង្ហបុរី, វឌ្ឍនភាពនៃដំណើរការផ្តល់សច្ចាប័ន​លើកិច្ចព្រម​ព្រៀង​ភាព​ជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) រវាងអាស៊ាន និងបណ្តាប្រទេសជាភាគីសមាជិក និងជាពិសេសការត្រៀមខ្លួនរបស់កម្ពុជា​ក្នុង​ការ​រៀប​ចំ​ទទួ​លធ្វើជាប្រធានអាស៊ាន និងការត្រៀមរៀបចំកិច្ចប្រជុំនានានៅឆ្នាំ២០២២ ខាងមុខ។

ក្នុងជំនួបនេះ ឯកឧត្តម ប៉ាន សូរស័ក្ដិ បានជម្រាបជូនភាគីសិង្ហបុរី អំពីកិច្ចខិតខំប្រឹងប្រែងរបស់កម្ពុជាក្នុងការគ្រប់គ្រង និងការទប់ស្កាត់ការរីករាល​ដាល​នៃ​ជំងឺ​កូវីដ-១៩ ជាពិសេសយុទ្ធនាការចាក់វ៉ាក់សាំងជូនប្រជាពលរដ្ឋកម្ពុជា និងជនបរទេសគ្រប់រូប ដែលជាកត្តាសំខាន់សម្រាប់ការស្តារទ្បើងវិញនូវសេដ្ឋកិច្ចសង្គម។ ឯកឧត្តមក៏បានជម្រាបជូនអំពីទំនាក់ទំនងពាណិជ្ជកម្មនិងវិនិយោគកម្ពុជា-សិង្ហបុរី និងកិច្ចសហប្រតិបត្តិការដែលភាគីទាំងពីរគួរផ្តោត​លើក្នុង​ការ​ស្តារទ្បើងវិញ​នូវ​​សេដ្ឋកិច្ចសង្គម រួមមាន ការបន្តធានានូវរំហូរទំនិញ ការផ្គូរផ្គងធុរកិច្ច ការពង្រឹងវិស័យពាណិជ្ជកម្មអេឡិចត្រូនិកការកសាងខ្សែច្រវាក់ផ្គត់ផ្គង់តំបន់ និងការ​ប​ង្កើនការវិនិយោគរបស់សិង្ហបុរីនៅកម្ពុជា។ ឯកឧត្តមក៏បានជម្រាបជូនអំពីវឌ្ឍនភាពក្នុងការរៀបចំការងារសំខាន់ៗ និងទិសដៅការងារ​ក្នុងការ​ត្រៀម​របស់​ក​ម្ពុ​ជា​ក្នុងនាមជាប្រធានអាស៊ានឆ្នាំ២០២២ ជាពិសេសក្រោមសសរស្តម្ភសហគមន៍សេដ្ឋកិច្ចអាស៊ាន ក្នុងនោះរួមមាន ការចងក្រងឯកសារគន្លឹះ ស្តីពីសមិទ្ធផ​ល​អា​ទិ​ភា​ពសេដ្ឋកិច្ចសំខាន់ៗ ជាដើម។ ឯកឧត្តមក៏បានលើកឡើងពីបច្ចុប្ប ន្នភាពលើដំណើរការផ្តល់សច្ចាប័ន​លើកិច្ចព្រមព្រៀងភាពជា​ដៃគូសេដ្ឋកិច្ចគ្រប់​ជ្រុង​ជ្រោ​យ​​តំបន់ (RCEP) និងបានជម្រាបអំពីសារៈសំខាន់នៃការចូលជាធរមាននៃកិច្ចព្រមព្រៀងនេះ នៅដើមឆ្នាំ២០២២ ដើម្បី​អាច​ទាញ​យកផលប្រយោ​ជន៍​ពី​កិច្ច​ព្រ​ម​​ព្រៀ​ងនេះ ស្របពេលនឹងកិច្ចខិតខំប្រឹងប្រែងស្តារទ្បើងវិញនូវសេដ្ឋកិច្ចសង្គម។

ក្នុងជំនួបនេះដែរ រដ្ឋមន្ត្រីពាណិជ្ជកម្មនិងឧស្សាហកម្មសិង្ហបុរី បានបញ្ជាក់ពីការប្តេជ្ញាចិត្តក្នុងការពង្រឹងកិច្ចស​ហប្រតិបត្តិការពាណិជ្ជកម្ម និងវិនិយោគកម្ពុ​ជា​-សិ​ង្ហ​​បុរី ព្រមទាំងគាំទ្រយ៉ាងពេញលេញក្នុងការផ្តល់កិច្ចសហប្រតិបត្តិការយ៉ាងជិតស្និទ្ធ ដើម្បីជួយគាំទ្រកម្ពុជាឱ្យទទួលបានជោគជ័យ​នាពេលដែល​កម្ពុជា​ធ្វើ​ជា​ប្រធានអាស៊ាន ជាពិសេសក្នុងការរៀបចំកិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ាន និងកិច្ចប្រជុំពាក់ព័ន្ធក្រោមសសរស្តម្ភសហគមន៍​សេដ្ឋកិច្ច​អា​ស៊ាន​ក្នុង​ឆ្នាំ២០​២២​៕​ អត្ថបទ ៖ គង់ ឌិន