អគារមួយកន្លែង បានបាក់រលំ បន្ទាប់ពីការផ្ទុះដ៏ខ្លាំងមួយ កាលពីថ្ងៃអង្គារ នៅក្នុងស្រុក Doumen ក្នុងខេត្តក្វាងទុង(Guangdong) ប្រទេសចិន។ 

វីដេអូកាំមេរ៉ាសុវត្ថិភាព ដែលទទួលបានដោយសារព័ត៌មាន Reuters បានបង្ហាញពីពេលដែលការផ្ទុះបានកើតឡើង បន្ទាប់មកធ្វើឲ្យបាក់អគារលំនៅឋានកម្ពស់ពីរជាន់ដោយមានផ្សែងធូលីដ៏ក្រាស់។

វីដេអូ ក៏បានបង្ហាញពីប្រជាជន ឈរនៅលើគំនរបាក់បែក ដោយសម្អាតថ្មបេតុង និងកម្ទេចកម្ទី ខណៈពួកគេស្វែងរកមនុស្សដែលជាប់នៅខាងក្រោម។

យោងតាមសេចក្តីថ្លែងការណ៍របស់រដ្ឋាភិបាលក្នុងតំបន់បាននិយាយថា យ៉ាងហោចណាស់មនុស្សបួននាក់ បានជាប់ក្នុងគំនរបាក់បែក ហើយប្រព័ន្ធផ្សព្វផ្សាយរដ្ឋ CCTV បានរាយការណ៍ថា ឧបទ្ទវហេតុនេះ បានបណ្តាលឲ្យមនុស្ស៣នាក់ស្លាប់ និងម្នាក់រងរបួស។ 

ទូរទស្សន៍ CCTV ក៏បានរាយការណ៍ផងដែរថា ការស៊ើបអង្កេតបឋមរបស់អាជ្ញាធរ បានបង្ហាញថា មូលហេតុនៃការផ្ទុះនេះ គឺជាការលេចធ្លាយឧស្ម័ន។