តុលាការធម្មនុញ្ញរបស់ប្រទេសថៃ នៅថ្ងៃពុធ (ទី៧ ខែសីហា) នេះ បានចេញសេចក្ដីសម្រេចរំលាយគណបក្សប្រឆាំងដ៏មានប្រជាប្រិយ គឺគណបក្សបោះជំហានទៅមុខ (Move Forward) ជុំវិញយុទ្ធនាការដ៏ចម្រូងចម្រាសរបស់គណបក្សនេះ ក្នុងការស្វែងរកការធ្វើវិសោធនកម្មច្បាប់ ដែលការពារកុំឲ្យមានការរិះគន់ដល់របបរាជានិយមដ៏មានឥទ្ធិពល។

ការរំលាយគណបក្សឈ្នះការបោះឆ្នោតឆ្នាំ២០២៣ គឺជាឧបសគ្គចុះចុងក្រោយបំផុត សម្រាប់គណបក្សនយោបាយធំៗរបស់ប្រទេសថៃដែលនៅតែជាប់នៅក្នុងសមរភូមិដ៏ច្របូកច្របល់ អស់រយៈពេល ២ទសវត្សរ៍មកហើយ ដើម្បីដណ្ដើមអំណាចជាមួយនឹងទំនាក់ទំនងដ៏មានឥទ្ធិពលរបស់ក្រុមអភិរក្សនិយម គ្រួសារអ្នកមានទ្រព្យធន និងឧត្តមសេនីយ៍រាជានិយម។

គួរបញ្ជាក់ថា ការសម្រេចនេះធ្វើឡើងក្នុងរយៈពេល ៦ខែបន្ទាប់ពីតុលាការដដែលនេះ បានបញ្ជាឲ្យគណបក្សបោះជំហានទៅមុខទម្លាក់ចោលផែនការរបស់ខ្លួន ដែលទាមទារឲ្យធ្វើកំណែទម្រង់ច្បាប់ ស្តីពីការប្រមាថព្រះមហាក្សត្រ ដោយសម្រេចថា យុទ្ធនាការនោះផ្ទុយនឹងរដ្ឋធម្មនុញ្ញ ហើយមានហានិភ័យបំផ្លាញប្រព័ន្ធគ្រប់គ្រងរបស់ប្រទេសដែលមានព្រះមហាក្សត្រជាប្រមុខរដ្ឋ។ តែការចោទប្រកាន់នោះ ត្រូវបានគណបក្សបដិសេធ។

ទោះបីជាការរំលាយនេះ ទំនងជាធ្វើឲ្យមានការក្រេវក្រោធពីអ្នកបោះឆ្នោតវ័យក្មេង និងនៅទីក្រុងរាប់លានដែលគាំទ្រចលនា និងរបៀបវារៈដ៏ជឿនលឿនរបស់គណបក្សបោះជំហានទៅមុខក៏ដោយ ក៏ផលប៉ះពាល់នៃសេចក្តីសម្រេចនេះ ត្រូវបានគេរំពឹងថា នឹងមានកម្រិត ដោយមានតែនាយកប្រតិបត្តិ ទាំងបច្ចុប្បន្ន និងអតីតចំនួន ១១រូបប៉ុណ្ណោះរបស់គណបក្ស ដែលត្រូវបានហាមឃាត់មិនឲ្យធ្វើនយោបាយរយៈពេល ១០ឆ្នាំ។

នោះមានន័យថា សមាជិកសភាចំនួន ១៤៣នាក់របស់គណបក្ស នឹងរក្សាអាសនៈរបស់ពួកគេ ហើយត្រូវបានគេរំពឹងថា នឹងរៀបចំឡើងវិញនៅក្រោមគណបក្សថ្មីមួយ ដូចដែលពួកគេធ្លាប់បានធ្វើនៅឆ្នាំ២០២០ នៅពេលដែលគណបក្សមុន គឺ Future Forward ត្រូវបានរំលាយដោយសារការរំលោភលើច្បាប់មូលនិធិយុទ្ធនាការ៕