បេក្ខជនប្រធានាធិបតីរបស់គណបក្សប្រជាធិបតេយ្យ គឺលោកស្រី Kamala Harris កំពុងទាក់ទាញបានការគាំទ្រពីអ្នកបោះឆ្នោតស្បែកខ្មៅបន្ថែមទៀត ពោលគឺច្រើនជាងលោកប្រធានាធិបតី Joe Biden មាននៅពេលរូបលោកមិនទាន់ដកខ្លួនពីការប្រកួតប្រជែង នាឆ្នាំនេះ ខណៈដែលប្រជាប្រិយរបស់លោក Donald Trump ខាងគណបក្សសាធារណរដ្ឋ បានកើនឡើងបន្តិចក្នុងចំណោមអ្នកបោះឆ្នោតស្បែកស នៅរយៈពេលប៉ុន្មានខែថ្មីៗនេះ។ នេះបើយោងតាមការវិភាគនៃការស្ទង់មតិរបស់ Reuters/Ipsos។ 

ការវិភាគដែលបានពិនិត្យលើការឆ្លើយតបជាង ១០.០០០នាក់ពីការស្ទង់មតិរបស់ Reuters/Ipsos នៅទូទាំងប្រទេសចំនួន ៧ដងដែលត្រូវបានធ្វើឡើងចាប់តាំងពីខែឧសភា ចង្អុលបង្ហាញពីគុណសម្បត្តិ និងគុណវិបត្តិសំខាន់ៗ សម្រាប់លោកស្រី Harris ជាអនុប្រធានាធិបតីអាមេរិកដែលបានទទួលនាទីធ្វើយុទ្ធនាការបន្តពីលោក Biden នៅពេលដែលលោកប្រធានាធិបតីបានសម្រេចបញ្ចប់ការប៉ុនប៉ងជាប់ឆ្នោតឡើងវិញ កាលពីថ្ងៃទី២១ ខែកក្កដា។

គួរបញ្ជាក់ថា លោកស្រី Harris នឹងក្លាយជាស្ត្រីស្បែកខ្មៅដំបូងគេ ដែលជាប់ឆ្នោតជាប្រធានាធិបតី ក៏ដូចជាជនជាតិអាមេរិកាំងអាស៊ីដំបូងគេដែរ ប្រសិនបើលោកស្រីអាចឈ្នះលោក Trump ក្នុងការបោះឆ្នោតថ្ងៃទី៥ ខែវិច្ឆិកា។

អ្នកបោះឆ្នោតស្បែកខ្មៅ ៧០ភាគរយ ដែលត្រូវបានស្ទង់មតិ កាលពីខែកក្កដា បានជ្រើសរើសលោកស្រី Harris ជាងជ្រើសរើសលោក Trump នៅលើសន្លឹកឆ្នោតសន្មត ពោលគឺកើនឡើងពីចំនួន ៥៩ភាគរយនៃគាំទ្រ ចំពោះលោក Biden នៅក្នុងការស្ទង់មតិ កាលបីខែឧសភា និងខែមិថុនា។ ចំណែកលោក Trump ឃើញឡើងការគាំទ្រតិចតួច ក្នុងចំណោមអ្នកបោះឆ្នោតស្បែកខ្មៅ ដោយឡើងដល់ ១២ភាគរយ ខណៈកាលពីខែឧសភា និងមិថុនា មាន ៩ភាគរយ។ 

ទន្ទឹមនឹងនោះ លោក Trump កំពុងទទួលបានប្រជាប្រិយភាពពីអ្នកបោះឆ្នោតស្បែកស។ ប្រហែល ៥០ភាគរយ បានជ្រើសរើសលោក Trump នៅក្នុងការស្ទង់មតិខែកក្កដា ដោយកើនឡើងពីចំនួន ៤៦ភាគរយ នៅក្នុងខែឧសភា និងខែមិថុនា។ ចំណែកលោកស្រី Harris មានការគាំទ្រតែ ៣៨ភាគរយប៉ុណ្ណោះនៃអ្នកបោះឆ្នោតស្បែកស ក្នុងខែកក្កដា ធៀបនឹងកម្រិត ៣៦ភាគរយនៅក្នុងខែឧសភា និងខែមិថុនា៕