ឧទ្ធម្ភាគចក្រ ១គ្រឿង បានធ្លាក់នៅភាគកណ្តាលប្រទេសនេប៉ាល់ នាថ្ងៃពុធ (ទី៧ ខែសីហា) នេះ ដោយបានបណ្ដាលឲ្យមនុស្សទាំងអស់ជិះនៅលើនោះបាត់បង់ជីវិត ដែលរួមមានអ្នកបើកបរ និងអ្នកដំណើរជនជាតិចិន ៤នាក់។

គួរបញ្ជាក់ថា ប្រទេសនេប៉ាល់មានប្រវត្តិដ៏អាក្រក់ ស្តីពីសុវត្ថិភាពអាកាសចរណ៍ ហើយសាធារណរដ្ឋហិមាល័យ បានឃើញមាននូវឧបទ្ទវហេតុធ្លាក់យន្តហោះធុនស្រាល និងឧទ្ធម្ភាគចក្រជាបន្តបបន្ទាប់ ក្នុងរយៈពេលជាច្រើនទសវត្សរ៍មកនេះ។

ឧទ្ធម្ភាគចក្ររបស់ក្រុមហ៊ុន Air Dynasty ដែលចេញដំណើរពីរដ្ឋធានី Kathmandu កំពុងហោះហើរទៅកាន់តំបន់ Syabrubesi ជាកន្លែងចេញដំណើរ សម្រាប់ផ្លូវដើរកម្សាន្តផ្សេងៗដែលភ្ញៀវទេសចរនិយម។

សេចក្តីប្រកាសព័ត៌មានរបស់អាជ្ញាធរអាកាសចរណ៍ស៊ីវិល បានឲ្យដឹងថា ឧទ្ធម្ភាគចក្រនោះបានបាត់ការទាក់ទងប្រហែល ៣នាទី បន្ទាប់ពីការហោះហើរ ហើយបានធ្លាក់នៅក្នុងតំបន់ Nuwakot ភាគខាងជើងនៃរដ្ឋធានី។

អ្នកនាំពាក្យនគរបាល លោក Dan Bahadur Karki បានប្រាប់សារព័ត៌មាន AFP ថា៖ «មនុស្សទាំង ៥នាក់ នៅលើឧទ្ធម្ភាគចក្រនោះ រួមទាំងអ្នកបើកបរផង ស្លាប់ទាំងអស់»។

មន្ត្រីតំបន់ Nuwakot លោក Ram Krishna Adhikari បានប្រាប់ថា សពមនុស្សចំនួន ៥នាក់ ត្រូវបានទាញយកចេញពីកន្លែងគ្រោះថ្នាក់នោះ។ ភ្លាមៗនេះ មូលហេតុនៃឧបទ្ទហេតុនេះ មិនទាន់បានដឹងនៅឡើយទេ៕