ប្រភពព័ត៌មានពីក្រុមនគរបាល បានបញ្ជាក់ថា បាតុកម្មរបស់ក្រុមនិយមស្តាំជ្រុលជាង ១០០កន្លែង និងបាតុកម្មតបតវិញ ប្រហែល ៣០កន្លែង គ្រោងនឹងរៀបចំឡើងនៅយប់ថ្ងៃពុធនេះ ។

 ស្ថានការណ៍នៅចក្រភពអង់គ្លេសកាន់តែក្តៅគគុក ស្របដែលក្រុមបាតុករប្រឆាំងជនមូស្លីម និងប្រឆាំងជនអន្តោប្រវេសន៍បានបង្កអំពើហិង្សា និងបំផ្លាញទ្រព្យសម្បត្តិសាធារណៈ ខណៈប៉ូលិសបានបង្រាបក្រុមនេះយ៉ាងហិង្សា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០៧ ខែសីហា ឆ្នាំ២០២៤ ។

 កាលពីដើមសប្តាហ៍មុន ក្រុមបាតុករបានប្រមូលផ្តុំគ្នានៅតាមដងផ្លូវ បន្ទាប់ពីមានករណីក្មេងស្រី ៣នាក់ ត្រូវបានសម្លាប់នៅក្នុងការវាយប្រហារដោយកាំបិតនៅទីក្រុង Southport ស្ថិតនៅតំបន់ភាគពាយ័ព្យប្រទេសអង់គ្លេស ។ 

ដោយឡែក ក្រុមនិយមស្តាំជ្រុលបានទាញយកផលប្រយោជន៍ពីករណីនេះ ដោយចោទប្រកាន់ថាជនសង្ស័យជាជនអន្តោប្រវេសន៍ម៉ូស្លីម ហើយពួកគេបានប្រើប្រាស់បណ្តាញសង្គមដើម្បីផ្សព្វផ្សាយព័ត៌មានមិនពិត និងបង្កើនកំហឹងក្នុងសង្គមអង់គ្លេស ។

ប្រភពព័ត៌មានពីក្រុមនគរបាល បានបញ្ជាក់ថា ការជួបគ្នារបស់ក្រុមនិយមស្តាំជ្រុល គ្រោងនឹងរៀបចំឡើងនៅមជ្ឈមណ្ឌលអន្តោប្រវេសន៍ ការិយាល័យតំណាងរាស្រ្ត និងសណ្ឋាគារផ្តល់ជាទីជម្រកដល់ក្រុមអ្នកស្វែងរកសិទ្ធិជ្រកកោន នៅតាម ៤១តំបន់ក្នុងចំណោមតំបន់ពង្រឹងកម្លាំងនគរបាល ៤៣កន្លែង ទាំងនៅអង់គ្លេស និងនៅវែលស៍ ។

 ក្រុមនគរបាលបង្រ្កាបកុបកម្មជិត ៤ពាន់នាក់ ត្រូវបានដាក់ពង្រាយនៅទូទាំងប្រទេស ក្នុងនោះកងកម្លាំង ២ពាន់នាក់បន្ថែមទៀត បានឈរជើង ៕