អត្តពលកម្ម៖ សហព័ន្ធខ្មែរអត្តពលកម្មស្ម័គ្រចិត្តបានបង្ហាញបញ្ជីឈ្មោះកីឡាករ-កីឡាការិនី ១៤រូបរួមទាំងគ្រូបង្វឹកម្នាក់គឺលោក គៀង សាម៉ន ដើម្បីត្រៀមបញ្ជូនទៅហ្វឹកហាត់នៅសាធារណរដ្ឋប្រជាមានិតចិននាពេលឆាប់ៗខាងមុខ ដើម្បីសម្រួចសមត្ថភាព និងបច្ចេកទេសត្រៀមការប្រកួតកីឡាស៊ីហ្គេមលើកទី៣១ នៅវៀតណាមផង ពិសេសត្រៀមស៊ីហ្គេមឆ្នាំ២០២៣ នៅកម្ពុជា។
អត្តពលិកដែលត្រៀមបញ្ជូនទៅហ្វឹកហាត់នៅចិននេះ រួមមានកីឡាករ ណឹប ច័ន្ទរ៉ុង និងកីឡាការិនី ឌួង ស្រីភាព ហាត់វិញ្ញាសារត់ ១០០ម៉ែត្រ, កីឡាករ ទត សាលីន និងកីឡាការិនី សាង លីដា ហាត់វិញ្ញាសារត់ ២០០ម៉ែត្រ, កីឡាករ យ៉ាត ពិទូចាន់ទិវា និងកីឡាករ សាត ឧត្តម ហាត់វិញ្ញាសារត់ ៤០០ម៉ែត្រ, កីឡាករ ឈុន ប៊ុនថន និងកីឡាការិនី កាន់ ស្រីរ័ត្ន ហាត់វិញ្ញាសារត់ ៨០០ម៉ែត្រ, កីឡាករ ផាត សុភុត ហាត់វិញ្ញាសារត់ ១,៥០០ម៉ែត្រ និងកីឡាករ ឧក រ៉ូហីត ហាត់វិញ្ញាសារត់ ៥,០០០ម៉ែត្រ។ រីឯ ៤រូបទៀតគឺមានកីឡាកលោចម្ងាយ ហឿន ចាវ, កីឡាករចោលដុំដែក ស៊ឹម សាមឌី, កីឡាករលោតកម្ពស់ រ៉ឹម ចាន់រដ្ឋា និងកីឡាការិនីចោលដុំដែក ផន សុវណ្ណារ៉ា។ តាមការគ្រោងទុកបេកកម្មបោះជុំរុំហ្វឹកហាត់ក្រៅប្រទេសនេះ គ្រោងធ្វើឡើងរយៈពេល ៣ខែដើម្បីពង្រឹងសមត្ថភាព និងបច្ចេកទេសរបស់កីឡាករ-កីឡាការិនីត្រៀមចូលរួមប្រកួតកីឡាស៊ីហ្គេម ២លើកចំពោះមុខពិសេសស៊ីហ្គេមឆ្នាំ២០២៣ នៅកម្ពុជា ហើយកីឡាករ-កីឡាការិនីគ្រោងនឹងចេញដំណើរទៅចិននៅចុងខែកញ្ញានេះ ក្រោមកិច្ចសហការរវាងរដ្ឋាភិបាលកម្ពុជា និងចិន តាមរយៈគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC)។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ធ្លាប់មានប្រសាសន៍ថា ភាគីចិនបានផ្ដល់ជំនួយឥតសំណង់ក្នុងការបញ្ជូនក្រុមជម្រើសជាតិកម្ពុជា ១២ប្រភេទស្មើនឹង ១៣៥នាក់ទៅហ្វឹកហាត់នៅចិនក្នុងពេលឆាប់ៗខាងមុខ បន្ទាប់ពីគម្រោងមួយនេះត្រូវបានពន្យារពេលអស់ជាយូរដោយសារការរីករាលដាលនៃកូវីដ-១៩ ដោយគោលបំណងសំខាន់នៃការបោះជុំរុំនេះគឺដើម្បីត្រៀមស៊ីហ្គេមនៅវៀតណាមផង និងស៊ីហ្គេមនៅកម្ពុជាផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
