កិច្ចប្រជុំបន្ទាន់មួយរបស់អង្គការកិច្ចសហប្រតិបត្តិការឥស្លាម ត្រូវបានកោះប្រជុំ ក្នុងពេលមានភាពតានតឹងកើនឡើងនៅមជ្ឈិមបូព៌ា បន្ទាប់ពីការធ្វើឃាតមេដឹកនាំជាន់ខ្ពស់ក្រុមហាម៉ាស នៅក្នុងប្រទេសអ៊ីរ៉ង់។

អ៊ីរ៉ង់ ដែលត្រៀមសងសឹកអ៊ីស្រាអែល បានស្វែងរកការយោគយល់ពីប្រជាជាតិឥស្លាមផ្សេងទៀត ដោយនិយាយថា ខ្លួនគ្មានជម្រើសផ្សេងក្រៅពីប្រើសិទ្ធិស្វ័យការពារ។

អង្គការកិច្ចសហប្រតិបត្តិការឥស្លាម (OIC) មានសមាជិកចំនួន៥៧ប្រទេស នៅមជ្ឈិមបូព៌ា អាហ្វ្រិក អាស៊ី និងនៅកន្លែងផ្សេងទៀត។

កិច្ចប្រជុំរដ្ឋមន្ត្រីការបរទេសបន្ទាន់ បានធ្វើឡើងនៅក្រុង Jeddah ប្រទេសអារ៉ាប៊ីសាអូឌីត កាលពីថ្ងៃពុធ។ ការជួបប្រជុំគ្នានេះ បានធ្វើឡើង បន្ទាប់ពីការស្លាប់មេដឹកនាំនយោបាយក្រុមហាម៉ាស់ លោក Ismail Haniyeh នៅក្រុងតេអេរ៉ង់ ជាទីដែលលោកកំពុងធ្វើទស្សនកិច្ច កាលពីថ្ងៃទី ៣១ ខែកក្កដា។ អ៊ីរ៉ង់ បានដាក់កំហុសលើអ៊ីស្រាអែល ចំពោះការធ្វើឃាតនេះ។

រដ្ឋមន្ត្រីការបរទេសស្តីទីរបស់អ៊ីរ៉ង់ លោក Ali Bagheri បាននិយាយទៅកាន់អ្នកចូលរួមថា ប្រទេសរបស់លោក គ្មានជម្រើសអ្វីក្រៅពីការអនុវត្តសិទ្ធិស្វ័យការពារ ដោយស្របច្បាប់នោះទេ ហើយសកម្មភាពបែបនេះគឺចាំបាច់ ដើម្បីទប់ស្កាត់ការរំលោភបន្ថែមទៀតលើដែនអធិបតេយ្យភាពរបស់ខ្លួន ហើយនឹងត្រូវបានអនុវត្តក្នុងលក្ខណៈឲ្យទាន់ពេលវេលា និងសមស្រប។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ខណៈអ្នកចូលរួម បានរិះគន់អ៊ីស្រាអែល ពួកគេបានលើកឡើងពីការព្រួយបារម្ភអំពីការប្រយុទ្ធគ្នានាពេលបច្ចុប្បន្ន ដែលកំពុងវិវត្តទៅជាជម្លោះក្នុងតំបន់កាន់តែទូលំទូលាយ។

ជាមួយគ្នានេះ ក្រុមហេសបូឡា Shia ឥស្លាម មានមូលដ្ឋាននៅប្រទេសលីបង់ ក៏បានប្តេជ្ញាសងសឹកអ៊ីស្រាអែល និងបន្តបាញ់គ្រាប់រ៉ុក្កែត ចូលទៅក្នុងប្រទេសនេះ កាលពីថ្ងៃពុធ។