យោងតាមប្រព័ន្ធផ្សព្វផ្សាយរដ្ឋកាលពីថ្ងៃពុធ លោកប្រធានាធិបតីអ៊ីរ៉ង់ ម៉ាស៊ូដ ប៉េហ្សេស្គីអាន (Masoud Pezeshkian) បានប្រាប់សមភាគីបារាំងលោក Emmanuel Macron ថា អ៊ីរ៉ង់នឹងមិននៅស្ងៀមចំពោះការឈ្លានពាននោះទេ ស្របពេលមានក្ដីបារម្ភការរីកធំនៃជម្លោះក្នុងតំបន់បន្ថែមទៀតបន្ទាប់ពីការសម្លាប់មេដឹកនាំក្រុមហាម៉ាស នៅក្នុងទីក្រុងតេអេរ៉ង់កាលពីសប្តាហ៍មុន។ 

លោក ប៉េហ្សេស្គីអាន បានប្រាប់លោក Macron នៅក្នុងការហៅទូរស័ព្ទ ដោយរិះគន់អ៊ីស្រាអែលជុំវិញសង្រ្គាមក្នុងដែនដីហ្កាហ្សារយៈពេល១០ខែមកនេះថា អ៊ីរ៉ង់នឹងមិននៅស្ងៀមឡើយក្នុងការប្រឈមរាល់ការឈ្លានពានប្រឆាំងនឹងផលប្រយោជន៍ និងសន្តិសុខរបស់ខ្លួន។  

លោកបាននិយាយថា ប្រសិនបើសហរដ្ឋអាមេរិក និងបណ្តាប្រទេសលោកខាងលិចពិតជាកំពុងស្វែងរកការទប់ស្កាត់សង្រ្គាមនៅក្នុងតំបន់មែន ពួកគេត្រូវតែបង្ខំឱ្យរបបអ៊ីស្រាអែលឲ្យបញ្ឈប់អំពើប្រល័យពូជសាសន៍ និងការវាយប្រហារលើតំបន់ហ្កាហ្សា និងទទួលយកបទឈប់បាញ់។ 

កិច្ចប្រជុំបន្ទាន់មួយរបស់អង្គការសហប្រតិបត្តិការអ៊ីស្លាមកំពុងត្រូវបានធ្វើឡើងកាលពីថ្ងៃពុធនៅប្រទេសអារ៉ាប៊ីសាអ៊ូឌីត តាមសំណើរបស់អ៊ីរ៉ង់ ដើម្បីពិភាក្សាអំពីការសម្លាប់លោក Ismail Haniyeh អតីតមេដឹកនាំក្រុមសកម្មប្រយុទ្ធហាម៉ាសប៉ាឡេស្ទីន ដែលមន្ត្រីអ៊ីស្រាអែល ពុំបានអះអាងទទួលខុសត្រូវចំពោះការស្លាប់នេះទេ។

ទីក្រុងតេអេរ៉ង់ និងក្រុមសម្ព័ន្ធមិត្តគាំទ្រដោយអ៊ីរ៉ង់ ដូចជាក្រុមហាម៉ាស និងហេសបូឡា បានចង្អុលមុខអ៊ីស្រាអែលថាបានសម្លាប់លោក Haniyeh កាលពីថ្ងៃទី ៣១ ខែកក្កដាឆ្នាំនេះ ។ ការស្លាប់របស់លោកគឺជាការសម្លាប់ជាបន្តបន្ទាប់នៃឥស្សរជនជាន់ខ្ពស់របស់ចលនាហាម៉ាសក្នុងអំឡុងសង្រ្គាមនៅដែនដីហ្កាហ្សា៕