មន្ត្រីជាន់ខ្ពស់រដ្ឋាភិបាលរុស្ស៊ី បានបង្ហាញការប្រុងប្រយ័ត្នចំពោះដំណើរទស្សនកិច្ចនាពេលខាងមុខរបស់នាយករដ្ឋមន្ត្រីជប៉ុន លោក Kishida Fumio ទៅកាន់ប្រទេសអាស៊ីកណ្តាល។

លោក Kishida គ្រោងនឹងទៅធ្វើទស្សនកិច្ចនៅប្រទេសកាហ្សាក់ស្ថាន អ៊ូសបេគីស្ថាន និងបណ្តាប្រទេសអាស៊ីកណ្តាលផ្សេងទៀត ចាប់ពីថ្ងៃសុក្រស្អែកនេះ ដើម្បីចូលរួមកិច្ចប្រជុំកំពូលនៃមេដឹកនាំក្នុងតំបន់ និងកិច្ចពិភាក្សាទល់មុខគ្នា។

ដំណើរទស្សនកិច្ចនេះ មានគោលបំណងជំរុញកិច្ចសហប្រតិបត្តិការជាមួយតំបន់នោះក្នុងវិស័យសេដ្ឋកិច្ច និងវិស័យផ្សេងៗទៀត។ មន្ត្រីមកពីក្រុមហ៊ុនជប៉ុនប្រហែល ៥០ ត្រូវបានគេរំពឹងថា នឹងអមដំណើរ លោក Kishida ។

នៅក្នុងការឆ្លើយតបជាលាយលក្ខណ៍អក្សរ នៅលើគេហទំព័ររបស់ក្រសួងការបរទេសរុស្ស៊ី អ្នកនាំពាក្យលោកស្រី Maria Zakharova បាននិយាយថា ការប៉ុនប៉ងរបស់ប្រទេសជប៉ុន ក្នុងការជ្រៀតចូលទៅអាស៊ីកណ្តាល ដែលមានចម្ងាយរាប់ពាន់គីឡូម៉ែត្រពីប្រទេសជប៉ុន មិនត្រូវបានជំរុញដោយផលប្រយោជន៍សេដ្ឋកិច្ចនោះទេ ប៉ុន្តែត្រូវទទួលឥទ្ធិពលដោយគោលនយោបាយទ្វីបអាមេរិក។

លោកស្រី និយាយថា ប្រទេសជប៉ុនកំពុងព្យាយាមពង្រីកផលប្រយោជន៍របស់ខ្លួនទៅក្នុងតំបន់ដែលរុស្ស៊ីបានចាត់ទុកជាផ្នែកនៃឥទ្ធិពលរបស់ខ្លួន។

លោកស្រី Zakharova បាននិយាយថា ប្រទេសជប៉ុន កំពុងព្យាយាមដើម្បី «ធ្វើឱ្យខូចប្រព័ន្ធទំនាក់ទំនងសេដ្ឋកិច្ចរវាងប្រទេសនៃតំបន់នេះជាមួយសហព័ន្ធរុស្ស៊ី ដែលត្រូវបានបង្កើតឡើងជាច្រើនទសវត្សរ៍មកហើយ។

លោកស្រី បាននិយាយបន្ថែមថា ប្រទេសជប៉ុនកំពុងព្យាយាម «អូសទាញ» បណ្តាប្រទេសអាស៊ីកណ្តាលទៅកាន់ «មនោគមវិជ្ជាលោកខាងលិចនៃសណ្តាប់ធ្នាប់ដោយផ្អែកលើច្បាប់» ដែលលោកស្រីអះអាងថាមាន «ការប្រឆាំងរុស្ស៊ី និងប្រឆាំងចិន យ៉ាងខ្លាំងក្លា» ។