សហរដ្ឋអាមេរិក កាលពីថ្ងៃពុធ (០៧ សីហា) បានជំរុញឱ្យអ៊ីស្រាអែល បើកការស៊ើបអង្កេត និងអនុវត្តច្បាប់លើអ្នកធ្វើខុស បន្ទាប់ពីវីដេអូមួយបានបែកធ្លាយ ដែលបង្ហាញទាហានអ៊ីស្រាអែលរំលោភបំពានផ្លូវភេទលើអ្នកទោសប៉ាឡេស្ទីន។

វីដេអូពីកាមេរ៉ាសុវត្ថិភាព ដែលត្រូវបានចាក់ផ្សាយនៅលើប៉ុស្តិ៍លេខ១២ របស់អ៊ីស្រាអែលនោះ បានបង្ហាញឱ្យឃើញទាហាន ជ្រើសរើសអ្នកទោសនៅមូលដ្ឋាន ស្ដេ តៃមែន (Sde Teiman) ជាទីដែលអ៊ីស្រាអែល ឃុំខ្លួនជនជាតិប៉ាឡេស្ទីន ក្នុងអំឡុងសង្រ្គាមហ្កាហ្សា។

វីដេអូនោះបង្ហាញឱ្យឃើញថា ទាហានអ៊ីស្រាអែលហាក់ដូចជាកំពុងធ្វើសកម្មភាពផ្លូវភេទលើអ្នកទោសដែលត្រូវបានជ្រើសរើស ដោយមានការបិទបាំងពីខែលនៅជាប់ជញ្ជាំង។ អ្នកទោសប៉ាឡេស្ទីនជាច្រើនដែលត្រូវបានដោះលែង តែងតែបានធ្វើការចោទប្រកាន់ពីទារុណកម្ម ការរំលោភ និងការបំពានផ្សេងៗទៀតនៅក្នុងមន្ទីរឃុំឃាំង ប៉ុន្តែអាជ្ញាធរអ៊ីស្រាអែល បដិសេធ។

អ្នកនាំពាក្យក្រសួងការបរទេសអាមេរិក លោក ម៉ាស៊ូ មីលឡឺ (Matthew Miller) បានប្រាប់អ្នកយកព័ត៌មានថា «យើងបានឃើញវីដេអូ និងរបាយការណ៍ពីការរំលោភផ្លូវភេទទាំងនោះ។ រដ្ឋាភិបាលអ៊ីស្រាអែល ត្រូវចាត់វិធានការស៊ើបអង្កេតអ្នក លើការចោទប្រកាន់ពីអំពើរំលោភបំពានទាំងនោះ ហើយនាំខ្លួនអ្នកធ្វើខុសឱ្យមកទទួលទោស»។

យោធាអ៊ីស្រាអែល កាលពីចុងខែកក្កដា បាននិយាយថា ខ្លួនកំពុងបើកការស៊ើបអង្កេតលើ «ការសង្ស័យពីការរំលោភបំពាន» លើអ្នកជាប់ឃុំនៅមូលដ្ឋាន Sde Teiman នេះ បន្ទាប់ពីការចោទប្រកាន់ដោយប្រព័ន្ធផ្សព្វផ្សាយអន្តរជាតិ ទីភ្នាក់ងារអង្គការសហប្រជាជាតិ និងក្រុមសិទ្ធិមនុស្ស។ ទាហានប្រាំបួននាក់ត្រូវបានគេនាំខ្លួនទៅសាកសួរ ដែលជំរុញឱ្យសកម្មជនអ៊ីស្រាអែលស្តាំនិយមជ្រុលតវ៉ាប្រឆាំងនឹងការស៊ើបអង្កេតនោះ៕